Pasditen e 3 Majit, në zonën e ish-Kënetës në qytetin e Durrësit, dy fëmijë të mitur humbën jetën dhe një i tretë mori plagë të rënda pasi një automjet që drejtohej nga një shofer në gjendje të dehur i përplasi ata teksa po luanin në një prej troturareve të lagjes së tyre.
Lajmi u përhap me shpejtësi në mediat vendase, si edhe në rrjetet sociale, ku nuk munguan pamjet e rënda dhe sensitive që ekspozonin viktimat dhe ripërjetonin traumën për familjarët e tyre.
Institucionet dhe aktivistët në mbrojtje të lirisë së medias reaguan lidhur me këto video të shpërndara në rrjet, duke i cilësuar ato si shkelje të rënda të etikës gazetareske dhe mbi të gjitha si jo humane.
Asosacioni i Gazetarëve të Shqipërisë u bëri thirrje mediave që të mos publikojnë pamje nga aksidenti tragjik, veçanërisht ato që shfaqin viktimat e mitur apo detaje të rënda nga vendngjarja.
“Publikimi i këtyre materialeve nuk i shërben informimit publik dhe cenon dinjitetin e viktimave, duke rënduar më tej dhimbjen e familjeve të tyre”, shkruan AGSH në reagimin zyrtar, duke theksuar se raportimi duhet të udhëhiqet gjithnjë nga përgjegjshmëria dhe respekti, duke shmangur përmbajtje që shkelin etikën profesionale.
Edhe Autoriteti i Mediave Audiovizive reagoi pas publikimit dhe shpërndarjes së videos tronditëse, duke bërë thirrje ndaj mediave për të ndalur abuzimin me dhimbjen njerëzore dhe shkeljen e rëndë të etikës dhe të çdo standardi.
“Mjaft! Kjo që po ndodh nuk është gazetari, është abuzim me dhimbjen njerëzore. Nuk është informim kur dhuna, tragjedia dhe fatkeqësia kthehen në uri për klikime”, shkruan Armela Krasniqi, kryetare e AMA-s.
Ajo e cilësoi publikimin e pamjeve të aksidentit si “rivrasje” dhe ekspozim të plagëve të hapura, duke ushqyer publikun me ulërima dhimbjeje dhe tronditje njerëzore.
Krasniqi u bëri thirrje gazetarëve dhe mediave të respektojnë dinjitetin e viktimave.
