Seanca gjyqësore kur pritej të paraqiteshin konkluzionet përfundimtare të ish-kreut të Autoritetit Rrugor Shqiptar, Evis Berberi dhe të pandehurve të tjerë të akuzuar për korrupsion, shkelje të barazisë në tendera e pastrim parash, e planifikuar për t’u zhvilluar të hënën më 4 maj, u shty për shkak të mungesës së avokatëve të dy të pandehurve.
Seanca filloi me më shumë se një orë e gjysmë me vonesë, pasi kryesuesja e trupit gjykues, gjyqtarja Marinela Osmani ndodhej në një proces tjetër. Gjatë kryerjes së apelit të palëve të pranishme në sallë, kryesuesja Osmani konstatoi se nuk ishin të pranishëm avokatët e të pandehurve Artan Leskoviku dhe Valbona Pepa. Prokurori i çështjes, Dritan Prençi konstatoi se në këto kushte ishte e pamundur të vijonte gjykimi.
Një prej avokatëve të pranishëm në sallë konstatoi për dijeni të gjykatës se përfaqësuesit ligjorë të dy të pandehurve kishin qenë prezentë në orën 12:00 kur ishte planifikuar të zhvillohej seanca. Ky fakt u pranua dhe nga gjykata që bëri me dije se edhe sekretaria gjyqësore kishte konstatuar praninë e tyre. Seanca u shty për më datë 18 maj, në orën 13:00.
Seanca e parë e gjykimit në themel të kësaj çështjeje u zhvillua më 13 janar. Megjithëse shqyrtimi u krye me procedurën e gjykimit të shkurtuar, seancat janë shtyrë kryesisht për shkak të mungesës së avokatëve, deri në momentin kur u paraqitën konkluzionet përfundimtare të prokurorisë, dy javë më parë.
Prokurori Dritan Prençi kërkoi deklarimin fajtor dhe dënimin me 10 vjet burg për ish-kreun e Autoritetit Rrugor Shqiptar, Evis Berberi, i akuzuar për gjashtë raste të korrupsionit pasiv, pesë raste të shkeljes së barazisë në tendera dhe pastrim parash. Në aplikim të gjykimit të shkurtuar, u kërkua dënimi i tij përfundimtar me 6 vjet e 8 muaj burg.
Në seancën e konkluzioneve përfundimtare, Prençi kërkoi që edhe 20 të pandehurit e tjerë të shpallen fajtorë për akuzat e korrupsionit dhe shkeljes së barazisë në tendera. Për ish drejtorin e Planifikimit Strategjik dhe Operacioneve në ARRSH, Erald Elezi, i cili mori drejtimin e KESH në vitin 2024, u kërkua dënimi me 1 vit burg. Masë e njëjtë dënimi u kërkua edhe për ish-drejtorin e ARRSH-së, Gentjan Gjyli, i cili në kohën kur akuzohet se ka kryer shkelje të barazisë në tendera, ka mbajtur pozicionin e drejtorit të Drejtorisë së Ndërtimit dhe i Mirëmbajtjes në atë institucion.
Sipas SPAK, nga hetimi janë evidentuar fakte penale në shtatë procedura prokurimi, të zhvilluara në vitet 2020-2022, në Agjencinë për Eficencën e Energjisë dhe Autoritetin Rrugor Shqiptar, gjatë kohës kur titullar i autoritetit kontraktor ka qenë i pandehuri Evis Berberi.
SPAK konstaton se tenderat janë fituar nga kompania Net – Group sh.p.k., në zotërim të të pandehurit Valter Begajt dhe vlerat monetare janë përfituar nga Berberi në mënyrë të tërthortë përmes shoqërisë DAAM sh.p.k., që vlerësohet se posedohet de facto prej tij. Po ashtu, sipas prokurorit Prençi, janë konstatuar edhe transaksionet e kryera me qëllim që Berberi të fshihte gjurmët e pronësisë së kësaj shoqërie, në vitin 2019 duke e ka kaluar fiktivisht pronësinë tek të pandehurit Brunilda Buli, Valter Begaj dhe Ervis Lami.
