Seanca gjyqësore për çështjen penale në ngarkim të Pëllumb Gjokës dhe ish-funksionarit të policisë, Ardrit Hasanbegaj e planifikuar të zhvillohej të martën më 5 maj në Gjykatën e Posaçme të Shkallës së Parë, u shty për mungesë të avokatëve të njërit prej të pandehurve. Gjyqtarja Flojera Davidhi konstatoi se i pandehuri Pëllumb Gjoka nuk ishte i pranishëm. Po ashtu, nuk ishin të pranishëm as përfaqësuesit e tij ligjorë, avokatët Gurali Brahimllari dhe Ylli Manjani. Gjyqtarja Davidhi bëri me dije se avokati Manjani kishte lajmëruar se ishte në një gjykim paralel dhe nuk mund të paraqitej. Ndërkohë, ishte paraqitur mbrojtësi i pandehurit Hasanbegajt, avokati Isuf Shehu, që do të duhej të kishte parashtruar bisedimet përfundimtare nëse do të ishte zhvilluar seanca.
Prokurorët Arben Kraja dhe Bledar Maksuti kërkuan ndërprerjen e seancës, për shkak të mbetjes pa mbrojtje të të pandehurit Gjoka, si dhe pezullimin e afateve të paraburgimit të tyre.
Gjyqtarja Davidhi konstatoi se sjellja e avokatëve të Gjokës është e përsëritur dhe për rrjedhojë caktoi një avokate kryesisht që të mundësojë përfaqësimin e Gjokës në seancat e ardhshme, në rast të mungesës së avokatëve të zgjedhur prej tij. Po ashtu, u pranua kërkesa e SPAK për pezullimin e afateve të paraburgimit. Seanca u shty për më datë 19 maj, në orën 12:00.
SPAK paraqiti më 26 shkurt konkluzionet përfundimtare në çështjen e veçuar ndaj të biznesmenit Pëllumb Gjoka dhe ish-funksionarit të policisë, Ardit Hasanbegajt, të akuzuar për sigurim të kushteve dhe mjeteve për të kryer vrasje, grup kriminal dhe armëmbajtje pa leje. Për të dy të pandehurit u kërkua që të deklarohen fajtor. Për biznesmenin Pëllumb Gjoka u kërkua dënimi me 14 vjet burg, ndërsa për Hasanbegajn 9 vjet heqje lirie. Gjykimi në këtë proces u zhvillua me gjykim të shkurtuar, prej nga të pandehurit përfitojnë uljen e 1/3-ës së dënimit nëse deklarohen fajtorë.
Ndërkohë, çështja penale ka dhe një tjetër ndarje, ku tre prej të pandehurve Pëllumb Gjoka, Behar Brajoviq dhe Edmond Preka po gjykohen veçmas për akuzat për vrasje.
Hetimi ndaj Gjokës dhe të pandehurve të tjerë filloi pas mbërritjes së një dosjeje nga Franca. Ndaj tij dhe anëtarëve të tjerë të grupit ka nëntë lloj akuzash për vepra penale, mes të cilave vrasje, korrupsion aktiv e pastrim parash, të kryera në kuadër të grupit të struktuar kriminal. Ndërsa zyrtarët e arrestuar si pjesë e organizatës akuzohen për korrupsion, zbulim të akteve apo të dhënave sekrete, si dhe për sigurimin e kushteve dhe mjeteve për të kryer vrasje.
