Gjykata e Posaçme e Shkallës së Parë rrëzoi të hënën më 11 maj një kërkesë të përsëritur të ish-Presidentit dhe kryetarit të Partisë së Lirisë, për zëvendësimin e masës së sigurimit “arrest në burg”, me një masë më të lehtë. Përfaqësuesi ligjor i Metës, avokati Kujtim Cakrani konstatoi se i mbrojturi prej gjendet prej 19 muajve në burg, megjithëse nuk është shpallur fajtor. Ai solli në vëmendje vendimin e pak ditëve më parë të Kolegjeve të Bashkuara të Gjykatës së Lartë, që ndryshoi praktikën për caktimin e masës së sigurimit personal. Sipas Cakranit, “arresti në burg”, mund të vendoset pasi të arsyetohet kur të gjitha masat e tjera janë të papërshtatshme.
Cakrani pretendoi se nuk ka asnjë arsye përse Meta të qëndrojë në burg dhe vërejti se Gjykata e Lartë e liroi nga “arresti shtëpiak”, të pandehurën për dosjen e AKSHI-it, Mirlinda Karçanajn, megjithëse ajo është akuzuar për grup të strukturuar kriminal. Po ashtu, Cakrani argumentoi se tashmë çështja ka kaluar në gjykim dhe se nuk ka asnjë rrezik për cënime të hetimeve. Ai kërkoi që të caktohet masa “detyrim paraqitje”, “ndalim i daljes jashtë shtetit”, “garanci pasurore” sipas vlerësimit të gjykatës, ose në alternativë “arrest shtëpie”.
Gjykata e pyeti avokatin Cakrani nëse kishte prova të reja për të dorëzuar në funksion të kërkesës për zëvendësimin e masës, por ai deklaroi se nuk kishte gjë tjetër përveç argumenteve që parashtroi, që i konsideroi të mjaftueshme. Ai deklaroi se nuk kishte besim që gjykata do ta ndryshonte masën.
Prokurori Sotir Kllapi evidentoi se mbrojtja e Metës nuk kishte paraqitur prova të reja. Sipas prokurorit, Gjykata e Lartë në vendim shprehet edhe lidhur me mbledhjen e provave gjatë gjykimit, ai tha se janë duke vujtur të mbledhin prova të reja për çështjen në gjykim dhe se nuk ka ndryshuar situata e Metës.
Avokati Cakrani kundërshtoi duke u shprehur se prokurorisë i kishte rënë një akuzë. Ai nënvizoi se prokuroria nuk përmendi asnjë fakt të ri rëndues. Sipas tij, të dhëna rëndojnë Kryemadhin dhe jo Metën. “Të kërkohet vijimi i ‘arrestit në burg’ pa asnjë argument, nuk qëndron”, tha Cakrani dhe shtoi se në kushtet që procesi do vijojë me gjykim të zakonshëm e do të thirren qindra dëshmitarë e do shqyrtohen mijëra akte, nuk mundet që Meta të qëndrojë në burg pa qenë i dënuar.
Pasi u tërhoq, gjykata vendosi të mos pranojë kërkesën e Metës, për lehtësimin e masës së sigurimit personal, duke e lënë atë në qeli.
Pas kësaj seance, u vijua me shqyrtimin e çështjes në themel. Seanca filloi me debate, pasi gjykata rrëzoi kërkesën për transmetimin e drejtpërdrejtë nga mediat. Zëri i mbrojtësit të Metës u dëgjua në sallën ngjitur.
Gjykata vendosi çeljen e shqyrtimit gjyqësor dhe prokurori Sotir Kllapi parashtroi në mënyrë të përmbledhur rrethanat e faktit të çështjes. SPAK e akuzon Metën për ndikime korruptive për episode që lidhen me çështjen CEZ-DIA, në një marrëveshje interkoneksioni, si dhe për një marrëdhënie të dyshuar korruptive për ndryshimin e një ligji në favor të biznesmenit Samir Mane. Sipas SPAK, akuza të ngjashme rëndojnë edhe mbi Monika Kryemadhin.
Ish-bashkëshortët Ilir Meta dhe Monika Kryemadhi nuk kanë kërkuar gjykim të shkurtuar. Për rrjedhojë, çështja në ngarkim të tyre do të vijojë me procedurën e zakonshme, të gjykohet nga tjetër trup gjykues.
Gjykata vendosi të pranojë kërkesën për gjykim të shkurtuar të tre të pandehurve të tjerë, nënës së Monika Kryemadhit, Fatime Kryemadhi dhe Ema Çokut, financuese e Partisë Lëvizja Socialiste për Integrim, të akuzuara për pastrim parash, si dhe të ish-kreut të AKEP, Pirro Xhixho, i akuzuar për korrupsion pasiv.
