Gjykata e Posaçme e Shkallës së Parë vendosi të martën më 12 maj deklarimin fajtor të dy të pandehurve Zef Mali dhe Jemine Çoku, të akuzuar për ndikim të paligjshëm në procedurën e transferimit të vëllait të kësaj të fundit, të dënuar në Turqi. Trupi gjykues i përbërë nga gjyqtarët Bib Ndreca, Alma Kodraliu dhe Etleva Deda vendosi deklarimin fajtor të të pandehurit Zef Mali dhe burgimin e tij me 2 vjet e 6 muaj heqje lirie, që në aplikim të gjykimit të shkurtuar u reduktua në 1 vit e 8 muaj burg. Në kohën kur Mali ka kryer këtë veprim të kundërligjshëm, mbante detyrën e oficerit të Shtabit për Menaxhimin e Forcave në Gardën e Republikës. Për rrjedhojë, është caktuar edhe dënimi plotësues, për heqjen e të drejtës për të ushtruar funksione publike, për një periudhë 5-vjeçare.
Gjykata ka gjetur fajtore dhe të pandehurën Jemine Çoku, e cila ka ndjekur procedurën e transferimit në Shqipëri të vëllait të saj, shtetasit shqiptar Kujtim Çeliku, i dënuar me burgim në Republikën e Turqisë. Ndaj Çokut është caktuar dënimi me 1 vit burgim dhe në aplikim të gjykimit të shkurtuar masa 8 muaj heqje lirie. Gjykata ka urdhëruar përjashtimin nga vuajtja e dënimit për të pandehurën Jemine Çoku, për shkak të ndihmesës që ka dhënë në hetimin e çështjes.
Sipas hetimeve, të pandehurës Çoku i’u morën 20 mijë euro, në këmbim të ndikimit tek funksionarët e Ministrisë së Drejtësisë, për realizimin e procedurës së transferimit të vëllait të saj. Nga hetimi rezultoi se procedura e transferimit të të dënuarit Çeliku, filloi.
