Gjykata e Posaçme vendosi të premten të dënojë me burgim të përjetshëm Plaurent Dervishajt për atentatin ndaj ish-prokurorit të Durrësit, Arjan Ndoja dhe Aleksandër Lahos, i njohur si “Rrumi”, i cili shkaktoi vdekjen e Andi Malokut.
Për të njëjtën vepër penale, Julian Meçaj u dënua me 35 vjet burg.
Kryesuesja e trupit gjykues, Marinela Osmani deklaroi se Plaurent Dervishaj është gjetur fajtor për tentativën e vrasjes së ish-prokurorit Ndoja dhe Lahos; për vrasjen e Andi Malokut; për sigurim të kushteve dhe mjeteve për të kryer vrasje para dhe pas ngjarjes së datës 1 nëntor në mbikalimin e Shkozetit, në Autostradën Durrës-Tiranë; për armëmbatje pa leje në dy raste; shkatërrim të pronës me ekspoloziv dhe për vjedhje në një rast, krime të kryera në formën e posaçme, atë të grupit të strukturar kriminal. Për vrasjen në rrethana të tjera cilësuese të Malokut, Plaurent Dervishaj u dënua me burgim të përjetshëm, dënim që mbeti në fuqi edhe pas bashkimit të dënimeve për veprat e tjera penale.
Për të njëjtat ngjarje u deklarua fajtor edhe i pandehuri Julian Meçaj, i cili u dënua në bashkim të dënimeve me 35 vjet heqje lirie. Gjykata caktoi që dënimi të kryhet në burg të sigurisë së lartë.
Të njëjtat masa dënimi u kërkuan edhe nga prokurori i SPAK, Adnan Xholi.
Dy të pandehurit, Plaurent Dervishaj dhe Julian Meçaj nuk ishin të pranishëm gjatë shpalljes së vendimit.
Prokuroria e Posaçme akuzoi Plaurent Dervishajn se në bashkëpunim me Redjan Rrajën, Ariol Halilin, Julian Meçajn, Bledar Polovinën, Amar Shkëmbin (alias Dritan), Ramazan Rrajën, Endrit Sinanin, Genti Nderjakun, Bashkim Haxhijan dhe Julian Pjetrin, kryen atentatin ndaj ish-prokurorit Ndoja, Aleksandër Lahos dhe të ndjerit Andi Maloku.
Dervishaj dhe Meçaj u gjykuan veçmas të pandehurve të tjerë, një pjesë e të cilëve janë gjykuar më parë dhe janë gjetur fajtorë. Gjykata ka dënuar për këtë vrasje Redjan Rrajën me burg përjetë dhe Ariol Halilin me 35 vjet heqje lirie. Të dënuar janë dhe Ramazan Rraja, Genti Nderjaku, Bashkim Haxhia, Endrit Sinani dhe Julian Pjetri.
Përgjatë seancave, avokati i Plaurent Derivshajt pretendoi se një prej viktimave në këtë procesi, Aleksandër Laho, ka tentuar i pari të vrasë klientin e tij, pasi këtij të fundit i ishte dhënë prokurorë nga të afërmit e gjyqtarit të vrarë, Skerdilajd Konomi, që t’i ndihmonte për të marrë pronat e tyre në Hamallaj të Durrësit.
Një hetim i Prokurorisë së Posaçme, ende i papërfunduar, tregon se si një grup i akuzuar për krim të organizuar, i drejtuar nga Aleksandër Laho, kontrollonte regjistrat e vjetër të pronave në arkivat e Kadastrave dhe i përdori ato për të marrë nën kontroll mijëra metra katrorë tokë në bregdetin e Durrësit dhe Tiranë – për t’i shitur më pas te të tretët.
