Prokuroria e Sarandës njoftoi të martën më 26 maj caktimin e masave të sigurimit për 12 punonjës të Poicisë së Shtetit, për zyrtarë vendorë e biznesmenë, të dyshuar për shpërdorim detyre e ndërtime të paligjshme. Sipas prokurorisë, katër zyrtarë të Inspektoriatit Vendor të Mbrojtjes së Territorit pranë Bashkisë Sarandë dhe katër punonjës të Komisiariatit të Policisë në këtë qytet, janë nën hetim për “shpërdorim detyre” dhe “mosmarrje të masave për ndërprerjen e gjendjes së paligjshmërisë”, të kryer më shumë se një herë dhe në bashkëpunim. Ndërkohë, janë proceduar për ndërtim të paligjshmëm katër biznesmenë në fushën e ndërtimit.
Prokuroria njoftoi se është bërë e mundur të ekzekutohen katër prej masave të sigurimit personal. Janë ndaluar tre punonjës të policisë së Komisiariatit Sarandë, ish shefi i seksionit të krimeve, B.T., i cili është lënë në “arrest shtëpie” dhe dy ndihmës specialistë të policimit në komunitet ndaj të cilëve është caktuar masa “arrest në burg”. Po ashtu, është ndaluar pronari i hotelit “Oasis”, A. P., ndaj të cilit është caktuar masa “arrest në burg” për “ndërtim të paligjshëm”.
Prokuroria bëri me dije se po vijon puna për mundësimin e ekzekutimit të masave të sigurimit personal ndaj tetë personave të tjerë, mes të cilëve edhe zyrtarë të Inspektoriatit Vendor të Mbrojtjes së Territorit në Bashkinë Sarandë.
