Pas Paradës së Krenarisë “Pride” 2026, e mbajtur më 23 maj në Tiranë, një numër mediash online, figurash publike dhe llogarish në rrjetet sociale publikuan komente dhe deklarata me gjuhë denigruese ndaj aktivistëve dhe anëtarëve të komunitetit LGBTIQ+, si edhe ndaj përfaqësuesve diplomatikë që mbështesin të drejtat e komunitetit në Shqipëri.
Debati u përshkallëzua pasi dy figura publike dhe më pas disa media online ripublikuan fotografi të dy vajzave të mitura të pranishme në paradë, duke i ekspozuar ato publikisht dhe duke i shoqëruar postimet me komente që organizatat e shoqërisë civile i cilësuan diskriminuese dhe joetike.
Në një reagim të përbashkët, 28 organizata dënuan publikimin e fotografive dhe akuzuan autorët për instrumentalizimin e fëmijëve nën pretekstin e “mbrojtjes së familjes”.
“Nëpërmjet publikimeve të tyre, Akil Pano dhe Jonathan Pano kanë zgjedhur të përdorin publikisht, pa pëlqimin e prindërve, imazhet e dy fëmijëve të mitur, duke i vendosur ata në qendër të një debati publik të ngarkuar me gjuhë diskriminuese, stigmatizuese dhe që nxit urrejtje ndaj familjes së tyre dhe komunitetit LGBTIQ+ në tërësi,” tha për BIRN Alba Ahmetaj nga ProLGBT, njëkohësisht njëra prej prindërve të vajzave.
Sipas organizatave, publikimi dhe shpërndarja e imazheve të identifikueshme të të miturve pa pëlqimin e prindërve ose kujdestarëve përbën shkelje të të drejtës së fëmijëve për privatësi, dinjitet dhe mbrojtje të të dhënave personale.
“Kjo nuk është mbrojtje e fëmijëve. Ky është instrumentalizim i tyre,” thuhej në deklaratë.
Megjithë sulmet ndaj komunitetit, aktivistët thanë se pjesëmarrja e lartë në paradën e këtij viti dhe reagimet mbështetëse nga qytetarë e aleatë treguan se retorika e urrejtjes në rrjetet sociale nuk pasqyron domosdoshmërisht qëndrimet e shoqërisë shqiptare.
Xheni Karaj, drejtuese ekzekutive e Aleanca LGBT, tha për BIRN se përballë sulmeve online, komuniteti ka parë gjithashtu një rritje të solidaritetit publik.
“Sa më shumë përpiqen të na frikësojnë apo të na heshtin, aq më shumë njerëz po kuptojnë rëndësinë e solidaritetit dhe të mbrojtjes së dinjitetit njerëzor,” tha Karaj.
“Shoh prindër, të rinj, qytetarë, figura publike dhe aleatë që kanë zgjedhur të flasin dhe të mos heshtin përballë dehumanizimit, por të tregojnë empati, dinjitet dhe njerëzi,” shtoi ajo.
