Ministri i Jashtëm shqiptar Ferit Hoxha e quajti ‘intimidim’ thirrjen e Rusisë për tërheqje të ambasadave nga Kievi duke njoftuar se Shqipëria ka vendosur të mos i bindet kësaj thirrje dhe të vijojë të mbajë misionin diplomatik në kryeqytetin ukranias
“Shqipëria e konsideron njoftimin e Rusisë ku u bën thirrje personelit diplomatik dhe qytetarëve të huaj të largohen nga Kievi përpara sulmeve të planifikuara si krejtësisht të papranueshëm” – shkruajti Hoxha në një postim në X të enjten.
“Kërcënimi i ambasadave nuk është diplomaci; është intimidim”- shtoi ai, duke akuzuar Rusinë se kishte kryer një tjetër shkelje të së drejtës ndërkombëtare dhe të Konventës së Vjenës për Marrëdhëniet Diplomatike.
“Shqipëria nuk do të tërhiqet. Ne mbetemi në Kiev. Ne qëndrojmë fort me Ukrainën. Dhe nuk do të intimidohemi”- lajmëroi ministri duke ripoziciunuar dhe një herë qëndrimin e Tiranës kundër luftës në Ukrainë.
Sipas Hoxhës, e vetmja rrugë përpara është t’i jepet fund një lufte që nuk duhej të kishte filluar kurrë dhe angazhim në negociata të vërteta dhe me mirëbesim për paqe.
Ministri i Jashtëm bëri gjithashtu të ditur se ky qëndrim i Tiranës i ishte komunikuar edhe ambasadorit të Rusisë në Tiranë.
Që prej nisjes së luftës në Ukrainë, Shqipëria është rreshtuar në mënyrë të pandryshuar në krah të Ukrainës dhe qëndrimeve të vendeve perëndimore në këtë konflikt, duke mbështetur sanksionet ndaj Rusisë dhe duke dënuar agresionin në të gjitha forumet ndërkombëtare.
Rusia ka kërcënuar me një valë të re “sulmesh sistematike” ndaj Kievit, vetëm pak ditë pasi kreu një nga bombardimet më të mëdha që prej nisjes së luftës.
Moska u ka bërë gjithashtu thirrje diplomatëve dhe qytetarëve të huaj të largohen “sa më shpejt të jetë e mundur” nga Kievi, ndërsa ka paralajmëruar qytetarët të shmangin ndërtesat administrative dhe ushtarake.
