Gjykata e Posaçme e Shkallës së Parë shpalli të enjten më 11 qershor vendimin për deklarimin fajtorë të 14 të pandehurve të akuzuar si anëtarë të ISIS dhe për marrje pjesë në veprime luftarake në Siri për llogari të kësaj organizate terroriste, si dhe dënimin e tyre në total me 112 vjet burg. Vendimi u dha nga trupi gjykues i përbërë nga gjyqtarët Irena Gjoka, Elsa Ulliri dhe Bib Ndreca.
Të pandehurit Shyqyri Kaca dhe Saimir Kaca u dënuan me nga 10 vjet burg secili; Bajram Sulaj, Arbër Stafasani dhe Erion Luto u dënuan me nga 9 vjet heqje lirie secili; Ditar Bala, Fatbardh Taushani, Nertil Hysenllari, Ledio Mehmeti dhe Erdet Korro u dënuan me nga 8 vjet burg; Ali Balliu me 7 vjet burg; Enes Kaca me 5 vjet burg dhe i pandehuri Usejd Stafasani me 4 vjet heqje lirie.
Të dënuarit akuzohen nga SPAK se kanë qenë anëtarë të organizatës terroriste ISIS. Disa prej tyre akuzohen se kanë rekrutuar persona persona të ndryshëm për ti bashkuar me organizatën terroriste në Siri. Shtatë prej tyre janë gjetur fajtorë edhe për veprime luftarake atje.
Në një raport të pesë viteve më parë mbi Situatën dhe Trendet e Terrorizmit (TE-SAT), misioni i policisë së Bashkimit Europian, EUROPOL theksoi se gjatë vitit 2020, organizatat terroriste u përpoqën të përdorin pandeminë globale të COVID-19 për të shpërndarë propagandë të urrejtjes, kryesisht në internet.
Shqipëria raportoi nëntë hetime të lidhura me terrorizmin që përfshinin 14 persona gjatë vitit 2020. Të dyshuarit nuk ishin pjesë e një grupi, por përfshinin të kthyer, të burgosur të radikalizuar dhe xhihadistë.
