Këshilli i Lartë Gjyqësor, KLGJ vendosi të enjten më 18 qershor emërimin dhe caktimin si gjyqtarë në nivel apeli të pesë anëtarëve të Kolegjit të Posaçm të Apelimit, KPA, të cilëve u përfundoi mandati një ditë më parë. Tre anëtarët e KPA-së, Sokol Çomo, Ina Rama dhe Albana Shtylla u emëruan pranë Gjykatës Administrative të Apelit, ndërsa dy anëtaret Natasha Mulaj dhe Mimoza Tasi u emëruan pranë Apelit të Juridiksionitt të Përgjithshëm.
Emërimi i pesë anëtarëve të KPA-së u krye bazuar në ligjin 96/2016 “Për statusin e gjyqtarëve dhe prokurorëve në Republikën e Shqipërisë”, ku në pikën 6 të nenit 166 të këtij ligji përcaktohet se “Anëtari i Kolegjit të Apelit emërohet si gjyqtar në nivel apeli në përfundim të mandatit, përveç rasteve kur ndaj tij është dhënë masë disiplinore gjatë ushtrimit të detyrës”.
Anëtarja e gjashtë e KPA-së, Rezarta Schuetz, nuk bëri kërkesë për emërimin si gjyqtare në Apel.
Kolegji i Posaçëm i Apelimit, shqyrtoi përgjatë nëntë viteve ankimet e kryera nga institucioni Komisionerëve Publikë dhe nga gjithë subjektet e rivlerësimit kalimtar, ndaj vendimeve të Komisionitt ë Pavarur të Kualifikimit. Vendimet e KPA ishin përfundimtare dhe kishin efekt të menjëhershëm.
