Prokuroria e Elbasanit njoftoi të premten më 19 qershor ekzekutimin e masave ndaj dy ish-funksionarëve të Policisë së Shtetit dhe drejtorit të Policisë Bashkiake të Devollit, të cilët akuzohen se i morën pasurinë një qytetari përmes dhunës. Ndaj ish-drejtorit rajonal të Agjencië së Mbikëqyrjes Policore për Korçën dhe Elbasanin, Glodian Ahmetaj, vartësit të tij, Devis Ago dhe ndaj drejtorit të Policisë Bashkiake pranë Bashkisë Devoll, Klevis Hoxha, janë caktuar masat e sigurimit personal “Detyrim për t’u paraqitur në policinë gjyqësore” dhe “Ndalimi i daljes jashtë shtetit” për kryerjen e veprës penale “Shtrëngimi me anë të kanosjes ose dhunës për dhënie pasurie” e kryer në bashkëpunim.
“Nga hetimi i deritanishëm ka dyshim të arsyeshëm se ish–funksionarët G.A, K.H dhe D.A, gjatë ushtrimit të detyrës, duke shfrytëzuar funksionet e tyre.. kanë shtrënguar me anë të dhunës shtetasin A.B, subjekt tregtar, duke shtënë në dorë në mënyrë të padrejtë pasurinë e tij me qëllim moskryerjen e kontrolleve ndaj subjektit që ky shtetas administron, duke cenuar marrëdhëniet juridike që mbrojnë lirinë e personit dhe pasurinë private”, citohet në njoftim.
Sipas prokurorisë, po vijonë hetimet për dokumentimin e mëtejshëm të veprimtarisë kriminale të tre ish-funksionarëve shtetërorë.
