Hetimet e Policisë çuan nën praga gjykatësin e Tiranës Ibrahim Hoxha, djalin e tij Ledjon Hoxha, qytetarin që i dha paratë ryshfet Dritan Jazexhiu si dhe ish-policin Nevruz Gajde, i cili vepronte si ndërmjetës. KLD pati rrëzuar kërkesën e Ministrit Nasip Naço për shkarkimin e tij dhe e pati vlerësuar punën e tij “shumë mirë”.
Gjyqtari, i Gjykatës së Rrethit Gjyqësor Tiranë Ibrahim Hoxha, 57 vjeç, u arrestua nga policia mbrëmjen e të hënës në Tiranë, në përmbyllje të një hetimi policor gjashtëmujor, bëri të ditur Ministria e Brendshme. Sipas një njoftimi për shtyp, oficerët e policisë, të cilët kishin të dyshuarit nën përgjim, ndërhynë në kohën kur Dritan Jazenxhiu, 48 vjeç, qe duke dhënë një shumë prej 600 mijë lekësh te djali i gjykatësit 25 vjeçari Ledion Hoxha dhe një ish polici që vepronte si ndërmjetës.
Prokuroria e Përgjithshme sqaroi më tej se hetimet që qenë kryer në bashkëpunim mes policisë dhe Prokurorisë së Krimeve të Rënda, kishin zbuluar mesditën e së hënës më 2 maj, një bisedë mes ndërmjetësit Gajde dhe gjyqtarit Hoxha ku Gajde flet për një “gjashtëshe” në lidhje me një vendim gjyqi civil ku 48 vjeçari Jazenxhiu qe palë.
Pasditen e së hënës, policia regjistroi ndërmjetësin Gajde duke u takuar me Jazenxhiun në lokalin e këtij të fundit, në Tiranë. Pak më vonë, Gajde u kap duke hyrë në një makinë që i përkiste shtetasit Ledjon Hoxha, djali 25 vjeçar i gjykatësit.
“Në mjetin e shtetasit Ledjon Hoxha ndërhyn Policia, e cila po i mbante nën vëzhgim lëvizjet e tyre dhe nga kontrolli gjen në mjet 600 mijë lekë (të reja)”, bëhet e ditur në njoftimin e Prokurorisë.
Për rrjedhojë, gjykatësi Hoxha u arrestua për veprën penale “korrupsion pasiv të gjyqtarit”, e cila dënohet me burgim nga tre deri në dhjetë vjet dhe me gjobë nga tetëqind mijë deri në katër milionë lekë, në rast se shpallet fajtor.
Djali i tij dhe ndërmjetësi, ish polici Gajde, u akuzuan për veprën penale të ushtrimit të ndikimit të paligjshëm dhe rrezikojnë të dënohen nga 6 muaj deri në 4 vjet burg.
Biznesmeni Dritan Jazenxhiu u akuzua për korrupsion aktiv të gjykatësve, vepër penale që parashikon dënim nga një deri në katër vjet burg.
Gjyqtari Ibrahim Hoxha ka qenë më herët subjekt i inspektimeve për dhënie vendimesh në shkelje të rregullave procedurale. Në dhjetor 2013, ish-ministri i Drejtësisë Nasip Naço i kërkoi KLD-së shkarkimin e tij nga detyra, në lidhje me një vendim të Hoxhës për moslejimin e ekstradimit drejt Italisë së Paro Laçit, një ish-aksioner i skuadrës së futbollit Partizani, i shumëkërkuar nga drejtësia italiane për trafik droge. Kërkesa e Naços për shkarkimin e tij nuk u miratua në Këshillin e Lartë të Drejtësisë. I njëjti këshill ka vlerësuar gjykatësin Ibrahim Hoxha dy herë me notën “shumë mirë” për veprimtarinë e tij si gjykatës në periudhën 2006-2009.
