Policia arrestoi Alban Voglin, 29 vjeç, pasi goditi me mjete të rënda Eduard Ilnicën, gazetarin sportiv që më herët pati ekspozuar dhunën e Voglit në ndeshjen e Kastriotit me Korabin, e vlefshme për Kategorinë e Parë.
Gazetari Ilnica, i cili punon për televizionin Telesport, u sulmua ndërsa po ecte në një rrugë në Tiranë dhe u godit në mënyrë brutale natën e kaluar.
Në një njoftim për shtyp sot në mëngjes, policia njoftoi se Alban Vogli, 29 vjeç, president i skuadrës së futbollit Kastrioti të Krujës, skuadër që aspiron për t’u kualifikuar në kategorinë superiore të kampionatit shqiptar, u arrestua shpejt pas sulmit.
“Ky shtetas ka tentuar të marrë me forcë në mjetin e tij tip “Volksëagen”, me targë AA229LB, shtetasin E. I., ku më pas e ka dhunuar duke e goditur me sende të forta, për arsye të një artikulli që shtetasi E. I. ka publikuar në një gazetë lokale,” thuhet në njoftimin e policisë.
Sipas Telesport, presidenti 29 vjeçar qe zemëruar nga fakti që gazetari ekspozoi dhunën e ushtruar prej tij gjatë një ndeshjeje të ditëve të fundit.
“Stafi i redaksisë së “Telesport” denoncon këtë akt burracak dhe i kërkojmë strukturave përkatëse shtetërore që të zbardhin sa më parë ngjarjen dhe të vënë para drejtësisë autorët e këtij akti të shëmtuar! Është një turp dhe rast i paprecedentë, ku një gazetar sportiv dhunohet për shkak të ushtrimit të fjalës së lirë,” deklaroi Telesport.