“Urgjent tek salla dy,” u dëgjua thirrja e fortë e një prej punonjësve të Policisë së Burgjeve në korridorin e Gjykatës së Posaçme, paraditen e të hënës rreth orës 11:30. Menjëherë, kolegët e tij dhe punonjës të sigurisë së gjykatës rendën për të shkuar në sallën ku, gjyqtari Bib Ndreca, po shqyrtonte një kërkesë penale për ndryshimin e masës së sigurisë për katër të akuzuar për rrëmbimin dhe vrasjen e 23 vjeçarit Renis Dobra në korrik të vitit të kaluar.
Një prej të pranishmëve në sallë tregoi për BIRN në kushtet e anonimatit se gjithçka kishte ndodhur në pak sekonda brenda kafazit të xhamtë. Vëllezërit Kristi, Fation dhe Aleksandër Bushgjokaj goditën me grusha e shqelma duke e rrëzuar për tokë të bashkëpandehurin tjetër, Petrit Çakri alias Hoxha, duke e quajtur “spiun”. Megjithëse katër punonjës të Policisë së Burgjeve gjendeshin ne kafazin e xhamtë, ka qenë e pamundur të parandalohej incidenti.
Të pranishmit në sallë reaguan duke kërkuar ndihmë e duke goditur me grushta tavolinat, me qëllim që t’u tërhiqej vëmendja punonjësve të sigurisë. Pasi u shtuan forcat e policisë, u bë e mundur që vëllezërit Bushgjokaj të neutralizohen dhe i dëmtuari të largohej nga kafazi.
Pasi rifilloi seanca, gjyqtari Bib Ndreca u hoqi vërejte të pandehurve agresorë, si dhe punonjësve të policisë.
Drejtori i Përgjthshën i Drejtorisë së Burgjeve, Adriatik Kupi i tha BIRN gjatë një bisede telefonike se tre vëllezërit Bushgjokaj kanë shfaqur probleme edhe më parë dhe për këtë arsye janë vendosur katër punonjës policisë të qëndrojnë në kabinën e xhamtë. Ai shtoi se janë ngritur komisione që po kryejnë verifikimin e rastit.
Gjykata e Posaçme e Shkallës së Parë i tha BIRN përmes koordinatores për të drejtën e informimit se nuk kanë qëndrim lidhur me ngjarjen.
Sipas procedurës, të pandehurit kur qëndorjnë në kabinën e xhamtë, u hiqen prangat.
