Apeli për Krimet e Rënda ka rrëzuar pafajësinë e shkurtër të Arben Frrokut duke dënuar me burgim të përjetshëm për vrasjen e komisarit të policisë, Dritan Lamaj.
Gjykata e Apelit i jep fund pafajësisë së shkurtër të Arben Frrokut, duke e dënuar me burgim të përjetshëm për vrasjen e komisarit të policisë, Dritan Lamaj. Frroku mungonte në sallën e gjyqit, në kohën kur Apeli për Krime të Rënda rrëzoi vendimin e shkallës së parë dhe i dha dënimin maksimal.
Më 3 prill 2015, Arben Frroku u shpall i pafajshëm nga Gjykata e Shkallës së Parë, pasi kishte qëndruar rreth 2 vjet në burg si i dyshuari kryesor për ekzekutimin e Dritan Lamajt. Prokuroria kërkoi dënimin e tij me burgim të përjetshëm, duke ofruar si prova një dëshmitar okular të mbrojtur, një eksperiment policor dhe konfliktin e hershëm mes viktimës dhe autorit.
Pas vendimit të Apelit, avokati i Arben Frrokut, Genc Gjokutaj paralajmëroi dërgimin e çështjes për shyrtim në Gjykatën e Lartë.
“Drejtësia është nën presion publik,” tha ai, i pyetur për vendimin e Gjykatës.
Oficeri i lartë i Policisë së Shtetit, Dritan Lamaj u vra më 24 shkurt 2013, duke shkaktuar tronditjen e opinionit publik në Tiranë. Policia shpalli në kërkim për këtë vrasje Arben Frrokun, i cili u arrestua një ditë më pas në Selanik të Greqisë.
Biznesmeni Frroku, njëherazi ish-kryetar i një partie politike që u drejtua më pas nga i vëllai, Mark Frroku mohoi autorësinë gjatë procesit, duke përdorur si alibi udhëtimin e tij drejt Greqisë. Avokati i tij pretendoi se Frroku ndodhej në afërsi të Elbasanit, në momentin kur ndodhi vrasja.
Megjithatë, Prokuroria dha një tjetër version në Gjykatën e Krimeve të Rënda. Përmes një eksperimenti policor, grupi hetimor pretendoi se koha ishte e mjaftueshme për Frrokun që të kryente vrasjen dhe të mbërrinte në pikën kufitare në momentin e treguar nga kamerat.
Në anën tjetër, Prokuroria siguroi dëshminë e një personi, i cili përfitoi më pas statusin e mbrojtjes. Dëshmitari okular me emrin e koduar Arben Ndoka pohoi në Gjykatë se e kishte parë Frrokun pa maskë, në makinën prej nga u qëllua Lamaj.
Dy pretendimet u përplasën në Gjykatën e Shkallës së Parë, prej nga doli i fituar Arben Frroku. Ndërsa Gjykata e Apelit i dha të drejtë Prokurorisë, duke dënuar me burgim të përjetshëm Frrokun.
Vendimi i Apelit pritet të shoqërohet me një urdhër-arrest të dytë për Arben Frrokun, megjithë dyshimet se ai ia ka dalë të arratiset nga vendi.
Më 20 qershor 2015, policia shqiptare u njoftua se Frroku ishte ndaluar në kufirin mes Malit të Zi dhe Kroacisë, pasi emri i tij ndodhej ende në listën e personave të kërkuar. Ai është mbajtur aty vetëm 5 orë, derisa policia shqiptare konfirmoi se Frroku ishte shpallur i pafajshëm. Vendndodhja e tij aktuale është e panjohur për policinë.
