/r/n/r/nDeputy Director of OFL, suspended from duty, Artan Shkembi, goes before the Special Court Against Corruption and Organized Crime after being accused of leaking secret data regarding a proceeding initiated by a foreign law enforcement agency. The hearing was adjourned at the request of Shkembi.
Gjykata e Posaçme e Apelit ka miratuar vendimin e Shkallës së Parë për caktimin e masës së sigurisë “pezullim nga detyra” të zv/drejtorit të OFL, Artan Shkëmbi, i proceduar nga SPAK për nxjerrje sekreti dhe korrupsion.
Gjykata e Posaçme e Apelit për Korrupsionin dhe Krimin e Organizuar, vendosi të enjten të lërë në fuqi “pezullimin nga detyra” të numrit dy të Operacionit Forca e Ligjit, OFL, Artan Shkëmbi, masë sigurie e caktuar nga Shkalla e Parë më datë 27 shtator pasi dyshohet për nxjerrje të sekretit hetimor.
“Është dhënë vendimi lidhur me çështjen në fjalë dhe është vendosur miratimi i vendimit të Shkallës së Parë”, ju përgjigj pyetjes së BIRN koordinatorja për të drejtën e informimit pranë Gjykatës së Posaçme të Apelit, Elisa Spahiu. Trupi gjykues që shqyrtoi çështjen në Apel përbëhej nga gjyqtaret Albana Boksi, Nertina Kosova dhe Saida Dollani, ndërsa akuza u përfaqësua nga prokurorja Doloreza Musabelliu.
Prokuroria e Posaçme kundër Korrupsionit dhe Krimit të Organizuar, SPAK ka regjistruar procedim penal ndaj Artan Shkëmbit për veprat penale “korrupsion pasiv i personave që ushtrojnë funksione publike” dhe “zbulimi i akteve dhe të dhënave sekrete”.
Pas caktimit të masës së sigurisë nga Gjykata e Posaçme e Shkallës së Parë, drejtuesi i Policisë së Shtetit, Ardi Veliu zbatoi vendimin për pezullimin nga detyra të Artan Shkëmbit.
Zv/drejtori i OFL, Artan Shkëmbi u konfirmua në detyrë me shumicë votash më datë 28 shkurt 2020 nga Komisioni i Jashtëm i Kualifikimit, KJV që po kryen procesin e vetingut në polici. Kryesuesi Alban Laska dhe anëtarja Mirela Ujkani në shumicë votuan për konfirmimin në detyrë të Shkëmbit. Ndërsa relatori i çështjes Artur Baku, në pakicë shprehet në vendim se, Artan Shkëmbi duhej të ishte shkarkuar për shkak se nuk arriti nivel të besueshëm në kriterin e pasurisë.
KJV identifikoi edhe faktin se Shkëmbi ka qenë me detyrë funksionale Punonjës Operativ, Oficer në strukturat e ish Sigurimit të Shtetit nga data 1 gusht 1990 deri më 1 tetor 1991, por kjo gjetje nuk u konsiderua penalizuese, duke vlerësuar se periudha e ushtrimit të funksionit ka qenë e shkurtër dhe se nuk raportohen të dhëna për shkelje të drejtave dhe lirive themelore të njeriut nga ana e tij.
Operacioni Forca e Ligjit nisi si një akt normativ, përputhshmëria e të cilit me Kushtetutën e Shqipërisë është vënë në pikëpyetje nga organizatat e shoqërisë civile dhe shumë ekspertë. Që nga krijimi në shkurt 2020, kjo njësi e policisë ka tërhequr vëmendjen e publikut për deklarata të njëpasnjëshme në të cilat është njoftuar dërgimi i formularëve të vetëdeklarimit të pasurisë të disa figurave të njohura apo të dyshuara për aktivitet kriminal. Ende nuk bëhet e ditur se çfarë efekti ka sjellë në luftën kundër krimit dërgimi i këtyre formularëve.
