Pyetur nga BIRN në lidhje me thirrjen e bërë nga organizatat e të drejtave të njeriut për delegacionin e BE-së në Tiranë në lidhje me dhunën e filmuar me celular nga dy policë bashkiakë të Tiranës ndaj një romi grumbullues mbeturinash, Delegacioni deklaroi se dënon “të gjitha format e diskriminimit” dhe se “mirëpret hetimin” e kësaj çështjeje.
Delegacioni i Bashkimit Europian në Tiranë dënoi të Mërkurën dhunën dhe përshëndeti nisjen e hetimeve nga ana e Avokatit të Popullit në lidhje me rastin e një romi grumbullues mbeturinash në Tiranë që u filmua nga një kalimtar ndërsa dy policë bashkiakë e dhunonin. Pas publikimit të videos në faqen e një grupimi aktivistësh në Facebook, një numër organizatash të të drejtave të njeriut dënuan dhunën në një deklaratë dhe i kërkuan partnerëve perëndimorë të Shqipërisë të reagojnë ndaj asaj që e quajnë “dhunë sistematike” nga policët bashkiakë të Tiranës ndaj ricikluesve, të cilët janë në shumicë dërrmuese nga komuniteti rom.
“Delegacioni i BE-së dënon të gjitha format e diskriminimit, margjinalizimit dhe dhunës, veçanërisht kundër anëtarëve të komuniteteve rome dhe egjiptiane”, deklaroi delegacioni për BIRN.
“Për rastin specifik të imazheve të qarkulluara në mediet sociale, Delegacioni i BE-së bazohet në punën e autoriteteve përkatëse kombëtare dhe në këtë drejtim mirëpret hetimin e nisur nga Avokati i Popullit për këtë çështje,” vijon më tej deklarata.
Bashkia e Tiranës nuk ka bërë komente publike mbi këtë çështje ndërsa një zëdhënës i saj nuk i është përgjigjur pyetjeve të BIRN të dërguara me SMS.
Policia bashkiake e Tiranës është shfaqur shpesh në median sociale duke keqtrajtuar qytetarë të ndryshëm, disave duke i bërtitur, të tjerëve duke u konfiskuar mjete të ndryshme tregtie, në kushte të paqarta ligjore.
Për organizatat, dhuna e Policisë Bashkiake të Tiranës është sistematike dhe e paligjshme. Një hetim i mëparshëm i Avokatit të Popullit ka konkluduar se Policia Bashkiake e Tiranës vepron të tejkalim të kompetencave të saja ligjore në lidhje me ricikluesit individualë.
Lexo më shumë: Organizatat dënojnë dhunën e policisë bashkiake ndaj ricikluesit
