Erion Veliaj u gjobit për shpërdorim të postit të kryetarit të bashkisë për fushatën elektorale të Partisë Socialiste ndërsa deklaroi se nuk kishte dijeni që ekziston një ligj që e ndalon dhe paralajmëroi se do ta apelojë vendimin.
Komisioneri Shtetëror i Zgjedhjeve Ilirjan Celibashi gjeti fajtor dhe gjobiti me 75 mijë lekë për shkelje të kodit zgjedhor pas një ankese të Lëvizjes Socialiste për Integrim. Veliaj deklaroi për Report TV se ai do ta apelojë vendimin ndërsa argumentoi se nuk kishte dijeni që një ligj aktualisht në fuqi e ndalonte atë të bënte propagandë elektorale.
“Bazuar në analizën e fakteve dhe provave të administruara nga KQZ, vendosi sanksionin administrativ me gjobë ndaj z. Erion Veliaj, Kryetar i Bashkisë së Tiranës në shumën 35. 000 për shkelje të nenit 92, pikat 1, 2 të Kodit Zgjedhor për mos raportim të aktiviteteve publike dhe në shumën 40. 000 lekë për shkelje të nenit 3, paragrafit 1.3, shkronja “b”, të vendimit nr. 9/2020 të komisionit Rregullator për zhvillimin e veprimtarive të ndaluara,” deklaroi KQZ në një njoftim për shtyp.
Veliaj u shfaq në një video duke dorëzuar çelësat e një shtëpie të rindërtuar pas tërmetit në zonën e Baldushkut, një aktivitet që sipas kodit zgjedhor përbën keqpërdorim të parave publike në funksion të propagandës elektorale të një partie politike.
“Gjoba do të apelohet,” deklaroi Veliaj në faqen e tij në Tëitter ndërsa në një prononcim në Report TV shprehu habinë për ekzistencën e një ligji që sipas tij e ndalon atë të punojë.
“Nuk na ka informuar kush që ka një ligj që të mos punohet që të fitojë Luli,” deklaroi Veliaj.
Karta e Kopenhagës, e cila ka vendosur kriteret për zgjedhje të lira dhe të ndershme, ka sanksionuar ndarjen e shtetit nga partia, duke nënkuptuar që ndërtimi i një shtëpie me paratë e taksapaguesve pas një fatkeqësie natyrore është një aktivitet i pavarur nga përkatësia politike e kryetarit të bashkisë dhe për rrjedhojë, prezantimi i këtij aktiviteti si propagandë elektorale përbën cënim të ndarjes së shtetit nga partia.
Marrëveshja politike e qershorit 2020, e cila u firmos dhe u miratua në parlament nga Partia Socialiste e Veliajt sanksionon në nenin 92 të Kodit Zgjedhor që aktivitete të tilla si përurime apo shpërndarje certifikatash pronësie të jenë të ndaluara për një periudhë katër mujore para datës së zgjedhjeve.
