Lajm19 Jul 2017

Lirimi i Alket Hatisë i kushton hetim disiplinor gjyqtarit të Durrësit

Pas ankesës së ministrit të Drejtësisë, Inspektoriati i KLD-së nis hetim disiplinor ndaj gjyqtarit Petraq Çurri për shkelje të dispozitave proceduriale në vendimin për lirimin nga qelia të të kërkuarit Alket Hatija.   

Autor: Klodiana Lala BIRN Tiranë
Printo

Alket Hatija, i kërkuari nga Interpol Roma dhe i liruar nga Gjykata e Durrësit. Foto:Policia e Shtetit.

Inspektoriati i Këshillit të Lartë të Drejtësisë ka nisur hetim disiplinor ndaj gjyqtarit Petraq Çurri, pas vendimit të tij të diskutueshëm të 11 korrikut për lirimin nga “masa e arrestit” të Alket Hatisë.

Inspektoriati i KLD-së u vu në lëvizje nga një ankesë e ministri i Drejtësisë, Gazmend Bardhi pasi Gjykata e Durrësit e shpalli të paligjshëm arrestimin e Hatisë, ndonëse ai ishte shpallur në kërkim ndërkombëtar nga Interpol Roma për shkak të dënimit me 20 vjet burg nga Gjykata e Apelit të Milanos për veprën penale të “trafikut të narkotikëve”.

Në vendimin e nisjes së procedimit disiplinor, të cilin BIRN e disponon, kryeinspektorja Marsida Xhaferrllari argumenton se si rregull, pretendimet ndaj gjykatës i nënshtrohen kontrollit gjyqësor nga një gjykatë më e larë. Megjithatë, ajo gjykon se ankesa e ministrit të Drejtësisë ka të dhëna të mjaftueshme dhe “dyshime të arsyeshme se shkelja mund të jetë kryer”.

“Në këtë rast, çmohet se ka vend për fillimin e hetimit disiplinor për shkelje të dispozitave proceduriale urdhëruese, lidhur me mënyrën e disponimit nga ana e gjyqtarit, disponim që ka sjellë një reagim të fortë mediatik referuar interesit të lartë publik që paraqesin këto raste,” thuhet në vendimin e Xhaferrllarit.

Qëllimi i hetimit disiplinor është të konstatojë nëse ka shkelje të rënda profesionale nga ana e gjyqtarit- të tilla që të mund të diskretitojnë pozitën dhe figurën e tij. Më parë, Gjykata e Durrësit e mbrojti vendimin e gjyqtarit Çurri përmes një njoftimi për shtyp, ku nënvizohej se kërkesa e Prokurorisë për Hatinë ishte e pabazuar në ligj, pasi mungonte një kërkesë e Ministrisë së Drejtësisë për “arrestimin” e tij për qëllime ekstradimi.

Alket Hatija, 44 vjeç-i etiketuar nga mediat italiane si “Zot i drogës” u arrestua me 8 korrik me urdhër të Prokurorisë së rrethit Durrës pasi emri i tij u shfaq në sistemin e personave të shpallur në kërkim ndërkombëtar nga Interpol Roma. Urdhri i kërkimit ndërkombëtar bazohej në vendimin e datës 30 shtator 2016 të Gjykatës së Milanos, që e dënonte Hatinë me 20 vjet burg për trafik narkotikësh.

Hatija-i cili ka vuajtur një dënim në Shqipëri në vitet 2008-2014 për “trafik narkotikësh” pretendon se e ka shlyer dënimin për të njëjtat fakte penale që është gjykuar së fundmi edhe në Itali.

Duke ndjekur protokollin rutinë për raste të ngjashme, Prokuroria i kërkoi Gjykatës së Durrësit miratimin e masës së “arrestit me burg”  për qëllime ekstradimi, ndërsa argumentoi se pretendimet e Hatisë janë të pavërtetuara, përsa kohë që vendimi i Gjykatës së Milanos nuk është administruar nga autoritetet shqiptare.

Por gjyqtari Petraq Çurri  e cilësoi të pabazuar në ligj arrestimin dhe urdhëroi lirimin e Hatisë, për shkak të mungesës së kërkesave nga Ministria e Drejtësisë dhe shteti italian. Prokuroria e Durrësit protestoi ndaj vendimit, ndërsa theksoi në një kërkesë drejtuar Apelit se “vendimi për Hatinë e kishte bërë ineficent sistemin e kërkimit ndërkombëtar”.

Sipas Prokurorisë, gjykata duhej veçse të ndiqte procedurën me të cilën është vepruar në të gjitha rastet analoge të arrestimeve të përkohshme për qëllime ekstradimi, pasi objekti i shqyrtimit ka qenë arrestimi i përkohshëm dhe jo vendimi për ekstradim.

Ndërsa avokati i Hatisë, Denion Bogdani i dha të drejtë gjykatës në një reagim për BIRN.

“Në kuptim të Konventës Evropiane për ekstradimet dhe të nenit 491/ç dhe 493/3 te K.Pr.Penale bën që Alket Hatisë t’i jetë cënuar parimi bazë i të drejtës penale “ne bis in idem”, jo dy herë për të njëjtën vepër dhe për pasojë të mos ekzistojnë as kushtet për ekstradimin e tij në të ardhmen, çka determinon në mos caktimin e një mase shtrënguese sigurimi,” tha Bogdani.