Mijëra mbështetës të opozitës protestuan të shtunën përpara Kryeministrisë dhe Ministrisë së Brendshme ndërsa kërkuan dorëheqjen e ministrit të Brendshëm, Xhafaj, dhe shkëmbyen tensione me policinë.
Protestues të opozitës u tubuan të shtunën në bulevardin “Dëshmorët e Kombit”, ku me thirrjet “Xhafaj Ik” kërkuan dorëheqjen e ministrit të Brendshëm, Fatmir Xhafaj dhe e akuzuan atë si të lidhur me krimin. Duke folur në protestë, lideri i Partisë Demokratike, Lulzim Basha e akuzoi qeverinë Rama se ka krijuar një sistem politik dhe ekonomik kriminal, ndërsa e quajti projektin e Rilindjes si antikombëtar.
“Projekti i Rilindjes u ngrit mbi katër gjëma anti-kombëtare dhe anti Europiane: Mbi aleancën me krimin, si burim parash, votash dhe force. Mbi zëvendësimin e shtetit të së drejtës, Kushtetutës dhe institucioneve, me sundimin personal, arrogant e të korruptuar. Mbi përqendrimin e të gjitha pasurive të vendit, dhe të gjithë pushtetit ekonomik në pak duar. Mbi propagandën, mashtrimet dhe keqinformimin e shfrenuar, për të fshehur realitetin,” tha Basha në protestë.
Pas mbarimit të fjalimit të tij, Basha u bëri thirrje protestuesve të marshojnë drejt Ministrisë së Brendshme. Disa protestues patën një përplasje të lehtë me gardhin policor përpara kryeministrisë ndërsa hodhën flakadanë dhe sende të tjera drejt zyrës së kryeministrit Rama.
Situata u tensionua më tej përpara Ministrisë së Brendshme, ku protestuesit rrëzuan gardhin përpara ministrisë dhe u përplasën me forcat speciale të policisë, ku bënë thirrje për dorëheqjen e ministrit Xhafaj. Gjatë këtij momenti u dëmtua në kokë kryeredaktori i “Rilindjes Demokratike”, Blendi Kasmi, për të cilin Partia Demokratike denoncoi si shkaktare dhunën e ushtruar nga policia. Ndërsa sipas Policisë së Shtetit, 11 punonjës të policisë mbetën të lënduar dhe po marrin ndihmën mjekësore në Spitalin Ushtarak.
Protesta vjen pas denoncimit nga Partia Demokratikë tënjë audio-përgjimi, që sipas saj tregonte se vëllai i ministrit të Brendshëm, Agron Xhafaj, i dënuar me 7 vjet e dy muaj burg nga drejtësia italiane ishte sërish i përfshirë në rrjetet e drogës. Audio-përgjimi është konsideruar si fabrikrim nga Agron Xhafaj, para se ky i fundit t’u dorëzohej autoriteteve italiane, nga ministri Fatmir Xhafaj si dhe kryeministri Edi Rama, çështje e cila është në hetim edhe nga Prokuroria.