Lajm10 Oct 2018

Tjetërsimi i 100 hektarëve në Zvërnec, arrestohet sërish Pëllumb Petritaj

Gjykata e Shkallës së Parë në Vlorë caktoi më 9 tetor masë sigurie “arrest me burg” për avokatin Pëllumb Petritaj, i cili dyshohet për tjetërsimin e 100 hektarëve në Zvërnec. Petritaj është dënuar më herët në Shkallën e Parë me tre vjet për të njëjtën akuzë. Ai i mohon akuzat.

Autor: Jerola Ziaj BIRN Tiranë
Printo

Bregdeti i Palasës në bashkinë e Vlorës. Foto: Ivana Dervishi/BIRN

Një ditë pasi Gjykata e Faktit në Vlorë vendosi masë sigurie “arrest me burg” avokati Pëllumb Petritaj 54 vjeç i akuzuar sërish për tjetërsimin e një sipërfaqeje prone në Zvërnec, u ndalua nga policia. Policia njoftoi se ndaj Petritaj, i dënuar më herët me 3 vjet burg në Gjykatën e Shkallës së Parë, rëndonin dy akuza, ndërsa ai dyshohej për tjetërsimin e pronësisë për 100 hektarë tokë.

“Shërbimet e Policisë kanë bërë ndalimin e tij pasi ky shtetas dyshohet të jetë autorë i kryerjes së veprave penale “Falsifikimi i dokumentave” dhe “Pastrimi i produkteve të veprës penale”, të parashikuara nga nenet 186/2 dhe 287/3 të Kodit Penal”, thuhet në njoftimin e policisë për ndalimin e Petritaj.

Të afërm të të arrestuarit i thanë BIRN se ai ishte vetëdorëzuar, pasi kishte mësuar se ishte shpallur në kërkim dhe gjykata kishte vendosur masë sigurie me burg.

Lexo edhe:

Policia bëri me dije se çështja ndaj Petritajt ishte e ngjashme me ato për të cilat ai është akuzuar më herët. “Nga hetimet e kryera, dyshohet se Pëllumb Petritaj  ka falsifikuar dokumentacionin e origjinës në lidhje me një sipërfaqe toke prej 100 Ha në zonën e Zvernecit”, thuhet në njoftimin e policisë. Petritaj i mohon akuzat.

Në prill të këtij viti Gjykata e Vlorës e shpalli Petritaj fajtorë për falsifikim të dokumenteve për tjetërsimin e 150 hektarëve tokë në Zvërnec. Ai u dënua bashkë me tre punonjës të agjencisë së Kthimit dhe Kompensimit të Pronave në Vlorë , për akuzat e falsifikimit të dokumenteve dhe shpërdorimit të detyrës. Çështja është apeluar, por ende nuk ka një vendim nga Gjykata e Apelit të Vlorës.

Ndërkohë emri i Petritaj del edhe në disa procese të ngjashme. Ai u mor fillimisht në hetim në vitin 2016, por më pas nuk u procedua si i akuzuar për tjetërsimin e një sipërfaqe prej 220 hektarë në Karaburun 89 hektarëve tokë në Zvërnec dhe 33 hektar tokë në Palasë.

Petritaj i ka mohuar akuzat, ndërsa ka akuzuar prokurorinë dhe gjykatën për njëanshmëri në çështjet ndaj tij.