Policët grek kanë ndaluar ish-gardianin serb Djuka Bogunoviq pasi që Kroacia ka lëshuar fletëarrest për arrestimin e tij me akuza për krime lufte, duke e paditur atë për torturimin e një polici.
Bogunoviq, i cili ka punuar si gardian në qytetin e Glinas gjatë luftës 1991-95 në Kroaci, është arrestuar këtë javë në një vendkalim kufitar nga policia greke derisa ai po shkonte në pushime me familjen e tij nga Serbia.
“Bogunoviq akuzohet për torturimin e një polici kroat nga shtatori i vitit 1991 deri në dhjetor të vitit 1991”, ka thënë të enjten OJQ-ja me zyra në Beograd – Veritas, e cila ka qenë në kontakt me familjen e Bogunoviqit.
Ish-gardiani, i cili ka jetuar në Serbi që prej përfundimit të luftës, është arrestuar të mërkurën dhe tani për tani është nën arrest në Selanik, në pritje për t’u transferuar në Kroaci.
Ai është dënuar më herët në mungesë në Kroaci për torturim të burgosurve të luftës dhe civilëve dhe ishte dënuar me 20 vjet burg, por ky vendim ishte anuluar më pas.
Bogunoviq është serbi i 13-të i Kroacisë i cili arrestohet për krime lufte në shtete të ndryshme të BE-së që prej fillimit të vitit 2014.
Sipas të dhënave të ministrisë serbe të drejtësisë, më shumë se 1,500 serbë janë duke u hetuar apo janë akuzuar për krime lufte nga Kroacia. Shumica e tyre jetojnë në Serbi.
