Duke sfiduar paralajmërimet nga qeveria e Serbisë dhe dënimet e mundshme për pjesëmarrje në luftëra të huaja, 14 luftëtarë serbë raportohet se i janë bashkuar separatistëve pro-Rusë në bazën e tyre të Donetskut
Kryeministri i enklavës separatiste pro-Ruse në Ukrainën lindore, Republika e Donetskut, njoftoi të hënën se 14 vullnetarë serbë janë bashkuar me forcat e tij në vështirësi.
Aleksandr Zakharchenk tha se trupat e tij po mbledhin vullnetarë nga e gjithë bota, njoftoi televizioni rus TV N.
Njoftimi i mbërritjes së një grupi të vogël serbësh vjen pasi qeveria e Serbisë tha se mund të hapë procese penale kundër nënshtetasve të vet që shkojnë të luftojnë në konflikte të huaja.
Ata që organizojnë vullnetarët mund të përballen me dënime me deri 12 vite burg ndërsa vetë luftëtarët mund të dënohen nga një deri në pesë vjet burg në rast se propozimet për ndryshime ligjore miratohen.
Rasim Ljajic, ministri i tregtisë së Servisë, i cili i përket partisë SocialDemokrate dhe që ka kërkuar ndryshimet në ligj, tha se pret që votimi mbi këtë çështje të kryhet në parlament këtë vjeshtë.
Agjencia ruse e lajmeve RIA Novosti raportoi javën e kaluar se vullnetarë nga Serbia po i bashkohen separatistëve pro-Rusë në luftën e tyre kundër trupave qeveritare në Ukrainën lindore.
Agjencia raportoi se Igor Strelkov, i cili udhëheq të vetëshpallurën Republika Popullore e Donetskut, ka thënë se njihte disa luftëtarë serbë që nga koha kur ata kishin luftuar në Bosnjë dhe Herzegovinë në vitet 1992-95.
Duke reaguar ndaj këtij lajmi, kryeministri i Serbisë Aleksandar Vucic komentoi se “dhjetëra serbë mund të gjenden duke luftuar në të dyja palët”.
“Çdo përzjerje e nënshtetasve serbë në krizën e Ukrainës është e dëmshme për Serbinë,” shtoi Vucic.
Kryeministri i Serbisë i kërkoi të gjithë vullnetarëve apo mercenarëve të tillë të kthehen në vendin e tyre dhe të mendojnë për shtëpitë dhe familjet e veta në vend që të luftojnë për pak mijëra dollarë.
“Serbia nuk është palë në konflikt. Serbia ka një politikë të përgjegjshme… ne po i kushtojmë gjithnjë e më shumë vëmendje njerëzve që kthehen nga Siria dhe Iraku si dhe atyre që janë angazhuar në konfliktin e Ukrainës,” shtoi ai javën e kaluar. “Ne po i monitorojmë aktivitetet e tyre”.
Serbia ka mbajtur një qëndrim neutral në lidhje me krizën në Ukrainë ndërsa gjendet nën presione të kundërta si nga Rusia ashtu edhe nga Bashkimi Europian.
Qeveria dëshiron të realizojë integrimin e Serbisë në BE deri në vitin 2020 dhe e ka bërë integrimin Europian një prioritet, por gjithashtu nuk dëshiron që ky proces të shkaktojë dëme në lidhjet tradicionalisht miqësore me Rusinë.
Forcat ukrainase kanë realizuar arritje të rëndësishme përballë luftëtarëve pro-Rusë gjatë javëve të fundit. Gjithsesi, rebelët mbeten në kontroll në Donetsk duke krijuar një dilemë për Ukrainën për shkak të numrit të madh të viktimave civile që mund të shkaktohen nëse ushtria lufton separatistët në një qytet të madh.
