Të dhënat e marra nga Balkan Insight tregojnë se nga viti 20009 deri më 2012, Ministria e Brendshme shpenzoi të gjithë buxhetin e vet të reklamave në një agjenci të vetme të lidhur me një figurë mediatike pranë qeverisë
Të dhënat u morën në bazë të një kërkese të bazuar në të drejtën e informimit dhe tregojnë se Ministria e Brendshme zhvilloi gjashtë fushata të mëdha reklamash televizive dhe prodhoi një spot në katër vjet për një total prej 85,4 milionë lekësh (610 mijë euro).
Të shtatë kontratat u dhanë për prodhimin dhe transmetimin e reklamave dhe që të gjitha shkuan te vetëm një agjenci reklamash, Promo Sh.p.k.
Tashmë e falimentuar, Promo qe nën pronësinë e vëllait të Aleksandër Frangajt, pronarit të televizionit Klan.
Si redaktor në fillim të viteve ’90 në gazetën Koha Jonë, Frangaj qe armik i Sali Berishës, presidentit të qendrës së djathtë në Shqipëri nga viti 1992 deri më 1997.
Më 1994 ai madje u burgos për një periudhë të shkurtër kohe kur ra në armiqësi me Berishën dhe Partinë Demokratike.
Por sapo Berisha rifitoi pushtetin më 2005, si kryeministër, Frangaj kultivoi marrëdhënie më të mira duke siguruar mbështetjen e tij.
Megjithëse kërkesa për informim te Ministria e Brendshme u dorëzua në tetor, Balkan Insight mori akses te të dhënat vetëm javën e kaluar, pesë muaj pas skadimit të afatit ligjor prej 35 ditësh.
Nga viti 2008 deri më 2012, Ministria e Brendshme drejtohej nga kryetari aktual i Partisë Demokratike, Lulzim Basha dhe nga presidenti aktual i Shqipërisë Bujar Nishani. Basha drejtoi nga viti 2009 deri më 2011 ndërsa Nishani qe ministër në vitet 2007-2009 dhe sërish nga viti 2011 deri më 2012.
Balkan Insight ka mësuar se kontratat bënin pjesë në një skemë më të madhe për të pasuruar median pro-qeveritare, e cila vijoi përgjatë tetë viteve kur Partia Demokratike mbante pushtetin.
Institucione të tjera qenë veçanërisht bujare me kompanitë ose nën pronësi ose të lidhur me Frangaj, përfshirë Këshillin e Ministrave, Ministrinë e Mbrojtjes dhe Drejtorinë e Përgjithshme të Policisë.
Ministria e Mbrojtjes përgjatë vetëm dy viteve dha 580 mijë euro në reklama për dy agjenci reklamash të lidhura me Frangaj, Promo Sh.p.k dhe Zoom Events. Televizioni Klan mori gjithashtu 427 mijë euro nga Këshilli i Ministrave më 2008 dhe 2010.
Ndërkohë Drejtoria e Përgjithshme e Policisë dha 198.9 milionë lekë (1.4 milionë euro) për Primo në tri fushata të mëdha reklamash nga 2010 deri më 2012.
