Ministrja Kumbaro thotë se vizita e Papës Françesk në Tiranë më 21 shtator – udhëtimi i tij i parë si Papë në Europë – do ta vendosë Shqipërinë në qendër të vëmendjes dhe do të gjenerojë mbulim të stërmadh mediatik
Ministrja e Kulturës në Shqipëri, Mirela Kumbaro, më 16 gusht tha se vizita e pritshme e Papës në Shqipëri do të gjenerojë interes të stërmadh mbi vendin.
“Kjo është një ngjarje e madhe që do të sjellë Shqipërinë në qendër të vëmendjes së medias ndërkombëtare,” tha Kumbaro para gazetarëve.
“Rreth 1 mijë gazetarë pritet të mbulojnë vizitën,” tha ajo.
Për gati gjysmë shekulli, nën regjimin brutal të diktatorit stalinist Enver Hoxha, Shqipëria qe vendi më i izoluar në Europë, i krahasueshëm sot me Korenë e Veriut.
Më 1967, Hoxha e deklaroi Shqipërinë vendi i parë ateist në botë, duke nisur një fushatë të re përndjekjeje kundër të gjitha religjioneve dhe në veçanti kundër Kishës Katolike, tradicionalisht e fuqishme në veri të vendit.
Sot, shumica e shqiptarëve janë muslimanë, ndërsa kishat ortodokse dhe katolike kanë ndjekës të shumtë.
Vizita njëditore e Papës Françesk do të fillojë me një ceremoni mirëseardhjeje te aeroporti ndërkombëtar i Tiranës “Nënë Tereza” ku do të pritet nga kryeministri Edi Rama.
Nga aeroporti, Papa do të udhëtojë drejt selisë së presidentit ku do të kryejë një takim kortezhe me presidentin Bujar Nishani. Pas kësaj, do të flasë para përfaqësuesve të autoriteteve civile.
Kulmi i vizitës së tij do të shënohet me një meshë të hapur në Sheshin Nënë Tereza, pasuar nga recitimi i Angelus.
Pas Meshës, Papa Françesk do të takohet me peshkopët e Shqipërisë për drekë në Nunciaturën Apostolike.
Në mbrëmje, papa Françesk do të takohet me udhëheqësit e feve të tjera dhe të denominimeve të tjera kristiane në Universitetin Katolik “Zonja e Këshillit të Mirë”.
Ati i Shenjtë do të udhëtojë për te katedralja e Shën Palit në mbrëmje për lutjet e mbrëmjes me priftërinjtë, motrat dhe vëllezërit e fesë, seminaristët dhe lëvizje të tjera.
Ngjarja finale në një axhendë të ngjeshur do të jetë një takim me fëmijët e “Centro Betania,” krahas përfaqësuesve nga institucionet e bamirësisë në Shqipëri.
