Një bombë në makinë shpërtheu herët në mëngjesin e të enjtes në qytetin jugor të Vlorës, duke vrarë një biznesmen vendës dhe duke plagosur dy njerëz të tjerë
Shpërthimi i fuqishëm shkatërroi makinën fouristradë Mitsubishi të bardhë në unazën e qytetit në orën 7.15 të mëngjesit, duke vrarë shoferin, një biznesmen ndërtimi, të cilit media shqiptare iu referua me disa emra. Policia e Shtetit nuk ka nxjerrë ende njoftim zyrtar mbi ngjarjen.
Nga shpërthimi mbetën të plagosur edhe një vajzë, që raportohej që qe duke udhëtuar në makinën ku qe vendosur bomba si dhe një kalimtar i rastit. Vajza 19 vjeçare e plagosur u transferua në Tiranë për trajtim të specializuar.
Policia dyshon se makina u hodh në erë duke përdorur shpërthim të telekomanduar. Viktima e aksidentit raportohet se qe pronari i një hoteli në fshatin e Radhimës.
Dimrin e kaluar, Shqipëria përjetoi një seri sulmesh me bomba, të cilat shënjestruan biznesmenë apo njerëz me të shkuar kriminale.
Më 31 janar, policia njoftoi se kishte goditur një grupim kriminal të dyshuar si vrasës me pagesë. Mes të dyshuarve qe 31 vjeçari Julian Sinanaj, i konsideruar si vrasësi i bandës.
Sinanaj dyshohet se ka kryer katër sulme me bombë dhe dy vrasje.
Sipas policisë, ai qe pas shpërthimit në shtëpinë e deputetit të Partisë Demokratike Ardian Kollozi në Vlorë më 1 qershor 2013.
Policia beson gjithashtu se Sinanaj vendosi një bombë që u gjet në makinën e prefektit të Vlorës, Besnik Dervishaj, më 13 dhjetorin e kaluar ndërsa ky i fundit po hynte në kryeministri në Tiranë.
Përgjatë viteve të fundit Shqipëria ka përjetuar një numër të konsiderueshëm vrasjesh të klasifikuara si vrasje mafioze për shkak se janë kryer në atë mënyrë që vrasësi nuk arrin të identifikohet nga policia.
