Një shqiptar i Kosovës u vra dhe dy të tjerë u plagosën në pyje në Kosovë, dyshohet nga një njeri i veshur me uniformë ushtrie serbe.
Avni Zahiti, zëdhënësi i Policisë së Kosovës, i tha BIRN se një njeri u qëllua për vdekje dhe dy të tjerë u plagosën në pyjet pranë Kollovengas, një fshat shqiptarësh pranë komunës serbe të Zubin Potokut.
Albion Brahimi, një nga të plagosurit, i tha gazetës Express se plumbat erdhën nga n jë person me uniformën e ushtrisë së Serbisë.
“Një person me uniformë të ushtrisë serbe na qëlloi. Unë arrita të shpëtoj edhe pse mbeta i plagosur dhe arrita të informoj familjen,” tha ai.
Ai tha se qenë duke prerë pemë në pyll në kohën kur u qëlluan.
Zyra e qeverisë së Servisë për Kosovën i tha BIRN se ata nuk kishin informacion të qartë për atë që ka ndodhur dhe nuk dinin nëse një njeri me uniformë serbe kishte hapur zjarr ndaj shqiptarëve të Kosovës.
Marko Djuric, kreu i zyrës është aktualisht duke vizituar veriun e Kosovës dhe raportohet se mund të shkojë në vendngjarje.
Incidenti ndodhi një ditë pasi Stevan Sindjelic, nga njësia speciale policore serbe e njohur si Xhandarmëria, u qëllua për vdekje nga sulmues të panjohur, dyshohet për prerës drurësh ilegalë në kufirin mes Kosovës dhe Serbisë.
Pas vdekjes së tij, Nebojsa Stefanovic, ministri i Brendshëm i Serbisë tha se Serbia nuk do të tolerojë sulme terroriste në territorin e saj dhe se policia do t’i përgjigjet me forcë çdo sulmi.
“Kam urdhëruar përforcimin e pranisë të forcave policore për të mbrojtur jetët e oficerëve të policisë, popullsinë vendore dhe interesat jetësore të vendit tonë,” tha Stefanovic për agjencinë e lajmeve Tanjug.
