Zagrebi tha se do të kushtëzojë rrugën e Serbisë dhe vendeve të tjera të Ballkanit drejt anëtarësimit në BE në rast se ata nuk japin më shumë informacion mbi kroatët që u zhdukën gjatë luftës së viteve 1991-95.
Ministri kroat për veteranët Predrag Matic paralajmëroi të shtunën se Serbia, Bosnja dhe Mali i Zi duhet të dorëzojnë të gjithë informacionin që kanë mbi kroatët e zhdukur ose Zagrebi do të përpiqet të bllokojë rrugën e tyre drejt Bashkimit Europian.
“Disa nga fqinjët tanë dëshirojnë të bashkohen në disa organizata Europiane… Gjithsesi, deri sa ata të provojnë qëllimet e tyre të ndershme dhe të na japin informacion të plotë për të cilin ne kemi arsye të besojmë se ata e kanë në Beograd, Bosnjë dhe Herzegovinë dhe një pjesë të tij në Malin e Zi, Kroacia nuk do të lejojë anëtarësimin e tyre në BE,” tha Matic në një ceremoni për të shënjuar Ditën Ndërkombëtare të të Zhdukurve në Zagreb.
“Nuk ka prioritete më të larta për ndonjë qeveri përveçse të gjejë se çfarë i ka ndodhur njerëzve që u zhdukën gjatë luftës [1991-95] dhe për t’i varrosur ata me dinjitet,” deklaroi presidenti i Kroacisë Ivo Josipovic para të familjarëve të njerëzve të zhdukur në të njëjtën ceremoni.
“Marrëdhëniet me fqinjët tanë do të varen nga angazhimi i të gjithëve ne në kërkimin e njerëzve të humbur,” paralajmëroi ai.
Ai tha se rreth 18 mijë kroatë u zhdukën gjatë luftës dhe 1,628 prej tyre nuk janë gjetur ende.
Të premten, presidentët e Bosnjës dhe Herzegovinës, Kroacisë, Malit të Zi dhe Serbisë nënshkruan një deklaratë të rëndësishme që synon të përshpejtojë kërkimin për rreth 13 mijë njerëz nga rajoni që ende rezultojnë të zhdukur nga konfliktet e viteve 1990.
Deklarata synon të nxisë bashkëpunimin mes shteteve dhe ta bëjë procesin e gjetjes dhe identifikimit të trupave të të vdekurve të luftës më pak traumatike për familjarët e tyre, duke i dhënë të drejtë të kërkojnë hetim mbi zhdukjen e të dashurve të tyre.
Por Ljiljana Alvir, kreu i Shoqatave të Familjeve të të Mbrojtësve të Burgosur dhe të Humbur të Kroacisë, vuri në pikëpyetje sinqeritetin e presidentit të Serbisë Tomislav Nikolic në premtimin e tij për të ndihmuar në gjetjen e viktimave kroate.
“E pashë si një nga ato premtimet e pafundme false që ne kemi parë edhe në të shkuarën,” tha Alvir.
