Agjencitë rregullatore të rajonit kanë rënë dakord më në fund të anulojnë gradualisht tarifat shtesë për bisedat celulare me roaming të cilat janë shumë më të larta se sa në Europën Perëndimore
Mali i Zi, Serbia, Shqipëria, Maqedonia dhe Turqia ranë dakord të firmosin marrëveshjen për të hequr tarifat shumë të larta të roamingut në rajon më 29 shtator, bëri të ditur Agjencia e Komunikimit Elektronik të Malit të Zi.
Ministrat e telekomunikimit nga vendet e Ballkanit do të firmosin marrëveshjen në qytezën bregdetare malazeze të Budvës gjatë Infofestit, një festival dedikuar përparimit të botës së informatikës që organizohet nga Ministria Malazeze e Telekomunikimit.
Anëtarët e agjencive rregullatore të rajonit do të takohen në Maqedoni gjatë ditëve të ardhshme për të diskutuar modalitetet e procesit drejt krijimit të një zone të çliruar nga tarifat roaming në Ballkan.
Autoritetet rregullatore besojnë se janë në gjendje të krijojnë këtë zonë komunikimi të lirë për udhëtarët duke filluar nga 1 janari 2015. Edhe Kosova dhe Bosnja do të jenë pjesë e zonës.
Sipas planit, tarifat roaming do të hiqen për të gjitha llojet e shërbimeve telefonike, – bisedat, mesazhet dhe internetit.
“Heqja e roamingut nuk do të fillojë që herët vitin e ardhshëm për shkak se disa vende firmëtare do të duhet të ndryshojë ligjet e tyre për zbatimin e kësaj marrëveshjeje. Pastaj ne mund të vendosim reciprocitet mes vendeve për të hequr roamingun dhe për të zbatuar direktivat e Bashkimit Europian,” bëri të ditur gazeta malazeze Vijesti duke cituar Zoran Sekulovic, kreun e Agjencisë së Komunikimit Elektronik të Malit të Zi.
Kostoja e roamingut në Ballkan është deri në gjashtë herë më e lartë se sa kostoja në Europën Perëndimore, bëhet e ditur nga studime të kryera sëfundmi.
Nën presion nga Komisioni Europian, operatorët e telefonisë celulare në BE u detyruan të unifikojnë çmimet e komunikimit mes vendeve të ndryshme dhe të ulin çmimet e roamingut. Në këtë parim, kryerja e një bisede telefonike nga një vend në tjetrin nuk ka pse të kushtojë më shtrenjtë se sa kryerja e bisedës brenda të njëjtit vend.
