I ndërtuar në formën e intervistave të qytetarëve dhe i ndërthurur me pamje ilustruese të jetës në qytete, regjisorja e dokumentarit të shkurtër, Arta Metolli, paraqet një panoramë njerëzore të Kosovës pas luftës. Me shpresa të mëdha për të ngritur në këmbë shtetin e tyre të porsalindur, në vitin 2008 shqiptarët e Kosovës, brohoritnin dhe lotonin gëzueshëm shpalljen e pavarësisë. Pas gjashtë viteve nga ky çast kulmor i historisë së kombit shqiptar, shpresat e popullit për drejtësi dhe demokraci duket se po daraviten. Sistemi ligjor është problematika më e madhe e ngritur në dokumentarin e shkurtër të regjisores Arta Metolli. Sipas një të intervistuari, klanet politike përfitojnë ekskluzivisht nga ligji, duke i lënë në harresë kërkesat dhe nevojat jetësore të qytetarëve të Kosovës. Shkelja e të drejtave të punëtorëve, papunësia te të rinjtë dhe rrogat e ulëta janë një tjetër arsye për vendasit që të psherëtijnë. “Vij çdo dy vjet këtu, pasi jam larguar qysh e vogël për në Amerikë ku prindërit e mi emigruan, më pëlqen Kosova e pavarur, por di që ashtu siç ka shumë njerëz që po përpiqen ta ngrenë lart, shumë të tjerë po i bëjnë keq,” shprehet një adoleshente e intervistuar. Me sytë nga Europa, shqiptarët e Kosovës nuk e ndalin ëndrrën të çojnë përpara demokracinë e shtetit që liruan me mund e me gjak.
