Dënimi i ish-kryeministrit maqedonas Vlado Buckovski u mbështet dhe nga gjykata e apelit, por koha e dënimit të tij për keqpërdorim të fondeve publike në një marrëveshje armatimesh u reduktua nga tre në dy vjet.
Buckovski, i cili u dënua për keqpërdorim të fondeve publike gjatë blerjes së pjesëve të këmbimit për tanket e ushtrisë, në kohën kur ishte ministër i mbrojtjes, para se të bëhej kryeministër i Maqedonisë, tha se do të ankohet në Gjykatën e Lartë.
“Ky proces gjyqësor ka zgjatur shtatë vjet, dhe gjatë gjithë kësaj kohe unë kam kërkuar drejtësi por më kot. Më lehtë mund të kisha gjetur një gjilpërë në kashtë. Gjithsesi, shpresa vdes e fundit, kështu që unë do të kërkoj drejtësinë në nivelin më të lartë, në Gjykatën e Lartë,” i tha ai medias pas dëgjimit të aktgjykimit të martën në mbrëmje.
Në korrik të vitit të kaluar, Gjykata e Krimeve në Shkup gjykoi Buckovskin dhe katër të tjerë fajtorë për prokurimin e paligjshëm të pjesëve të këmbimit për tanket maqedonas T-55 nga kompania MZT në fund të vitit 2001.
Sipas autoriteteve, dëmi i shkaktuar i ka kushtuar vendit mbi dy milionë euro.
Ish-shefi i shtabit të ushtrisë maqedonase, gjeneral Metodij Stamboliski, dhe një menaxher i MZT, Mitre Petkovski, janë dënuar gjithashtu me nga tre vjet burg.
Ish-oficeri i logjistikës së ushtrisë, Nelko Menkinovski, dhe një ish-punonjës i ministrisë së mbrojtjes, Aco Gjurçevski, u burgosën për dy vjet.
Buckovski, i cili më vonë u bë kryeministër gjatë viteve 2004-2006, mohoi akuzat.
Kur gjyqi filloi në vitin 2007, Buckovski, një ish-zyrtar i lartë nga ajo që tani është partia kryesore e opozitës, Social Demokratët, pohoi se ai po sulmohej për arsye politike.
Ai mohoi se ka prokuruar katër herë më shumë pjesë këmbimi për tanket se sa ishte në të vërtetë e nevojshme.
Mbrojtja e tij këmbënguli që në atë kohë, pjesët ishin të nevojshme për shkak se ka pasur rreziqe të larta të sigurisë për vendin.
Mbrojtja i ka dhënë gjykatës shënime me shkrim nga këshilli i sigurisë kombëtare, i cili në atë kohë këshillonte se ushtria duhet të mbahet në një gjendje të plotë gatishmërie për luftë.
Në vitin 2001, Maqedonia kaloi nëpër një konflikt të shkurtër të armatosur mes forcave të sigurisë dhe rebelëve shqiptarë etnikë. Konflikti përfundoi në të njëjtin vit me nënshkrimin e Marrëveshjes së Paqes të Ohrit që ka dhënë më shumë të drejta për komunitetin shqiptar.
Të pandehurit këmbëngulën se ata nuk i kanë kushtuar para shtetit me këtë prokurim, sepse pjesët mund të shitet sërish. Në janar të vitit të kaluar, në një letër drejtuar gjykatës, stafi i përgjithshëm i ushtrisë konfirmoi se pjesët janë ende duke u ruajtur në depot ushtarake.
