Gjithnjë e më shumë imigrantë të paligjshëm nga Azia, Afrika dhe Lindja e Mesme po kalojnë Malin e Zi të drejtuar për në Perëndim, thotë një raport i ri i policisë.
Një raport i policisë malazeze thotë se imigrantë nga Pakistani, Algjeria, Maroku, Afganistani, Siria, Tunizia dhe veçanërisht njerëz me origjinë kurde, po kalojnë në mënyrë të paligjshme transit në Mal të Zi, për të shkuar në Serbi e më pas në vendet Europiane.
Raporti për kërcënimet e krimit të organizuar në vend, i publikuar të hënën, thotë se organizatorët e transferimeve drejt Serbisë janë qytetarë vendas që punojnë së bashku me imigrantët nga të njëjtët shtete, të cilët kanë aplikuar tashmë për azil ose janë banorë me status të përkohshëm në Mal të Zi.
Të dhënat e policisë tregojnë se qytetarët turq dhe malazezë të përfshirë në kalimin kontrabandë të imigrantëve kërkojnë 3500 deri në 4000 euro për person.
Bashkëpunëtorët vendas, kryesisht shoferë mallrash apo taksistë, i transferojnë imigrantët përmes Malit të Zi në linjën nga Stambolli në Itali apo Austri.
“Duke marrë parasysh metodën e punës së kontrabandistëve turq, ekziston një rrezik real që së shpejti të fillojnë të përdorin vijën bregdetare të Malit të Zi për të kaluar imigrantë me skafe të vegjël për në Itali,” thotë raporti i policisë.
Imigrimi ilegal në Malin e Zi ka ende një “karakter transit”, thotë raporti, dhe nuk ka të dhëna për grupe të krimit të organizuar në vend, por bëhet fjalë vetëm për “individë të infiltruar përkohësisht”.
Imigrantët hyjnë në Malin e Zi në këmbë në 85 për qind të rasteve të regjistruara – nga rrugët malore dhe hekurudhore për në zonat e para të banuara.
Një problem madhor për Malin e Zi në vitet e ardhshme do të jetë abuzimi me sistemin e azilit dhe azilkërkuesit e rremë. Sipas legjislacionit të BE-së, Mali i Zi duhet t’i pranojë mbrapsht të gjithë ata persona që kanë kërkuar një herë azil në Mal të Zi.
Të dhënat e Drejtorisë së Azilit për periudhën 2011 deri në 2013 tregojnë një rritje alarmante të azilkërkuesve nga 115 persona në vitin 2011 në më shumë se 3000 në vitin 2013.
