Raporti i fundit i Forumit Ekonomik Botëror mbi aftësinë konkurruese të ekonomive nëpër botë rendit Bullgarinë si më të fortën në Ballkan dhe Serbinë e Shqipërinë si më të dobëtat.
Raporti i sapopublikuar i Konkurrueshmërisë Botërore 2014-2015 thotë se Bullgaria, Rumania, Maqedonia dhe Serbia kanë përjetuar përmirësim në renditjen botërore ndërsa Kroacia dhe Shqipëria kanë humbur disa pozicione.
Vrijtimi vjetor i Forumit Ekonomik Botëror mat 12 faktorë, përfshirë infrastrukturën, arsimin dhe trajnimin, eficencën e tregut të punës, gadishmërinë teknologjike dhe novacionin etj në 144 vende në të gjithë botën.
Sipas raportit, Bullgaria është udhëheqëse në Ballkan, e renditur në vend të 54-rt në botë – një përmirësim me tre vende në krahasim me vitin e kaluar.
Raporti gjithsesi thotë se Sofia qe një nga vendet më të këqija në botë sa i përket kriterit të “favoritizmit në vendimet e zyrtarëve të qeverisë” ku u rendit në vend të 134, ndërsa kapi më shumë pikë në kriterin e mjedisit të shëndoshë ekonomik për të cilin u rendit në vend të 36. Bullgaria i është nënshtruar një politike fiskale me rezerva të fuqishme valutore dhe fiskale gjatë 15 viteve të fundit, gjë që e ka bërë atë një nga të paktat vende të botës pa borxh publik.
Në vend të 59 në botë renditet Rumania që shënoi edhe progresin më të madh në krahasim me vitin e kaluar kur qe në vend të 79.
Fusha ku Rumania u rendit më keq qe “keqpërdorimi i shpenzimeve publike” për të cilën u rendit në vend të 116 në botë – si dhe për kapacitetin e vet për të mbajtur në vend punëtorët e talentuar, për të cilën u rendit në vend të 128.
Maqedonia, tashmë e renditur në vend të 63 në indeksin e përgjithshëm shënoi gjithashtu progres domethënës duke u ngjitur me dhjetë vende. Maqedonia u rendit më keq, në vend të 108, për treguesin e madhësisë së tregut, PBB-së dhe eksporteve, ndërsa u rendit më mirë, në vend të 38 për eficencën në tregun e mallrave, kriteri që mat konkurrueshmërinë.
Mali i Zi mbeti në vend të 67, i njëjti pozicion me vitin e kaluar. Këtij vendi iu dha renditja më e ulët, 134, për përmasat e tregut dhe mori renditjen më të mirë për shëndetësinë dhe arsimin fillor, në të cilin u rendit në vend të 29.
Kroacia ra dy vende në krahasim me vitin e kaluar dhe tashmë renditet në vend të 77. Një nga renditjet më të ulëta u shënua në eficencën e qeverisë, në vend të 139, ndërsa renditjen më të lartë e pati për infrastrukturën dhe teknologjinë në vend të 44.
Serbia në anën tjetër, lëvizi disa vende më sipër, duke arritur në vend të 94. Vendi u rendit gati në fund të listës, në vend të 1400 për “bashkëpunimin në marrëdhëniet punëdhënës-punëmarrës”, dhe iu dha gjithashtu renditje shumë e ulët për eficencën e qeverisë, në vend të 135.
Renditja më e mirë për Serbinë u shënua te teknologjia në vend të 49.
Akoma më poshtë në listë u rendit Shqipëria, në vend të 97 dhe në pozicionin më të keq në Ballkan. Shqipëria vitin e kaluar renditej në vend të 95 pra janë humbur dy vende.
Pikët më të këqija u morën te kriteri i të drejtave të pronësisë, në vend të 133 ndërsa më e mira u kap te “barra e rregullave të qeverisë në vend të 29 dhe te fuqia e mbrojtjes së investitorëve në vend të 14.
Bosnja dhe Kosova nuk qenë përfshirë në vrojtim.
