Gjatë një vizite në Beograd, aktori francez dhe mbështetësi i Kremlinit, Gerard Depardieu tha se ai ishte i lumtur që Serbia nuk kishte vënë sanksione mbi Rusinë për krizën e Ukrainës.
Depardieu takoi Kryeministrin serb Aleksandar Vucic të enjten dhe tha se Beogradi ishte treguar largpamës që nuk i ktheu kurrizin Rusisë, një vendi që ai i mban shtetësinë.
Duke diskutuar krizën e Ukrainës me Vucic, Depardieu e nënvlerësoi konfliktin e armatosur me separatistët pro-rusë, duke thënë se zënka në vend datonte që nga koha e Katerinës së Madhe.
Aktori tha se ai besonte që Presidenti Vladimir Putin, i cili ia dha personalisht pasaportën ruse vitin e shkuar, do ta zgjidhte krizën.
“Problemi i Ukrainës nuk është i ri, por unë jam i sigurt se Putin do ta zgjidhë,” tha ai.
Ai gjithashtu vlerësoi Serbinë, duke thënë se e vizitoi vendin për shkak të kulturës dhe “për të takuar njerëz human”.
“Është një shtet i madh, në fakt i vogël, por i madh kur bëhet fjalë për histori dhe kulturë,” tha ai në një konferencë për shtyp.
Gjatë takimit, Depardieu dhe Vucic biseduan rreth verës dhe ushqimit, ku aktorit iu dhanë produkte serbe dhe një shportë vere si dhuratë, tregoi ai.
“Jam veçanërisht i lumtur që zoti Depardieu i kushtoi respekt të madh Serbisë, historisë së saj dhe politikës,” tha Vucic në konferencën për shtyp.
Gjatë qëndrimit të tij në kryeqytetin serb, Depardieu planifikonte të vizitonte kryebashkiakun e Beogradit Sinisa Mali, Orkestrën Filarmonike të Beogradit, si dhe Arkivin e Filmit Jugosllav me Ministrin e Kulturës Ivan Tasovac.
Vitin e shkuar, Depardieu vizitoi Malin e Zi dhe u emërua si një ambasador i kulturës malazeze.
Ai u largua nga Franca dy vite më parë, me ankesa për taksat e larta mbi të pasurit dhe u zhvendos në Belgjikë.
