Përfaqësuesit e Kosovës në bisedimet me Serbinë nuk kanë mandate për të arritur marrëveshjen sepse Prishtina ende nuk ka qeveri, ndonëse kanë kaluar tre muaj nga zgjedhjet, thonë analistët.
Bisedimet teknike midis Kosovës dhe Serbisë pritet të vazhdojnë të enjten teksa delegacionet e dy vendeve do takohen në Bruksel, por analistët thonë se Kosova nuk mund të firmosë asnjë marrëveshje derisa të krijojë qeverinë.
Pritet që dy palët të diskutojnë të enjten për Marrëveshjen e Integruar të Kufirit (MIK) dhe lëvizjen e lirë të njerëzve.
Por qeveria në largim e Kosovës dhe grupet e punës të dërguara për bisedimet në Bruksel “nuk kanë mandate për të marrë ndonjë vendim të ri”, argumenton analisti politik kosovar Naim Rashiti.
“Delegacioni i Kosovës ka mandate vetëm për të diskutuar zbatimin e marrëveshjeve ekzistuese,” u shpreh ai.
Mosmarrëveshjet politike midis administratës në ikje dhe partive opozitare kanë penguar krijimin e një qeverie të re që prej zgjedhjeve të qershorit në Kosovë.
Por Marko Djuric, drejtor i zyrës së qeverisë serbe për Kosovën, shprehu optimizëm se progresi mund të bëhet pavarësisht kësaj.
“Mund të bëjmë shumë gjëra për të normalizuar marrëdhëniet Beograd-Prishtinë dhe këto gjëra nuk kanë përse varen nga bisedimet e nivelit të lartë politik,” tha Djuric për agjencinë serbe të lajmeve Tanjug të mërkurën.
“Serbia shet çdo vit rreth 400 milion euro mallra në Kosovë dhe Metohija dhe shumica e klientëve janë shqiptarë të Kosovës. Duam që përqindja të jetë më e lartë. Duam që tregtia të funksionojë në të dyja drejtimet,” shtoi ai.
Kosova dhe Serbia janë përfshirë në bisedime politike dhe teknike që kanë si qëllim të normalizojnë marrëdhëniet që nisën në vitin 2011 dhe që po ndërmjetësohen nga Bashkimi Europian.
Dialogu teknik ka rezultuar në nënshkrimin e një numri marrëveshjesh, përfshirë edhe atë të Menaxhimit të Integruar të Kufirit.
Zëvendës Kryeministrja në largim Edita Tahiri, e cila është në krye të dialogut teknik, tha për Balkan Insight më 26 gusht se ajo ishte optimiste se gjashtë pikat e kalimit të kufirit do të ndërtohen së shpejti në linjë të marrëveshjes MIK.
Kryeministri, po ashtu në ikje, Hashim Thaçi, tha në një takim me Kancelaren gjermane Angela Merkel në një konferencë në Ballkanin Perëndimor javën e shkuar, se ai dëshironte që dialogu me Beogradin të vazhdonte.
“Dua t’ju siguroj, e nderuar Kancelare Merkel dhe gjithë të pranishmit, se Kosova është gati të vazhdojë fazën e dytë të dialogut, që duhet të mbyllet me një marrëveshje ndërkombëtare paqe mes Kosovës dhe Serbisë,” tha Thaçi.
Beogradi nga ana e vet e ka kundërshtuar këtë ide kategorikisht.
“Serbia nuk do të nënshkruajë një marrëveshje ndërkombëtare paqe me Kosovën,” tha Ministri i Jashtëm serb Ivica Dacic.
