Brukseli i jep rëndësi fqinjësisë më shumë se sa zgjerimit ndërsa thekson se zgjerimi do të jetë i ngrirë për pesë vitet e ardhshme.
Presidenti i Zgjedhur i Komisionit Europian Jean-Claude Juncker theksoi sërish të mërkurën se për komisionin e tij zgjerimi do të jetë i ngrirë për pesë vitet e ardhshme ndërsa Komisioneri për Zgjerim dhe Fqinjësi do të ndërrojë emrin në “Komisioneri për Fqinjësi dhe Zgjerim”, bëhet e ditur nga Komisioni Europian.
Juncker publikoi të mërkurën listën e anëtarëve të komisionit të tij ku theksoi rëndësinë e ekonomisë dhe sigurisë për komisionin e tij. Ndryshe nga sa qe përfolur gjatë muajve të fundit, Juncker ka vendosur ta mbajë s funksion zgjerimin, por duke i ulur peshën në krahasim me fqinjësinë.
“Portofoli i Politikave të Fqinjësisë dhe Bisedimeve për Zgjerim i jepet Johannes Hahn, i cili, përveç përforcimit të politikës së fqinjësisë, i jep vëmendje vijimit të bisedimeve për zgjerim, ndërsa pranon se nuk do të ketë zgjerim të Bashkimit Europian për pesë vitet e ardhshme, siç ka përcaktuar Presidenti i Zgjedhur Juncker në Politikat e tij,” thuhet në njoftimin për shtyp të Komisionit Europian.
Juncker theksoi në fjalën e tij se ka zgjedhur 27 njerëz për të shërbyer në Komision me synimin për ta “futur Europën sërish në shtegun e shtimit të vendeve të punës dhe rritjes ekonomike”.
Johannes Hahn, 57 vjeç, nga Austria, i cili do të mbajë portofolin e Fqinjësisë dhe Bisedimeve për Zgjerim, ka punuar më herët si Komisioner për Politikat Rajonale në Komision.
“Jam i nderuar dhe i gëzuar që Presidenti i Zgjedhur më ka besuar mua këtë portofol të rëndësishëm për BE-në që përfshin përgjegjësi të gjera për Politikën e Fqinjësisë dhe Bisedimet për Zgjerim,” tha Hahn.
Ai theksoi se e ka për zemër Politikën e Fqinjësisë ndërsa nuk foli konkretisht për Zgjerimin.
Komisioni Europian kishte një komisioner për Marrëdhëniet me Jashtë dhe Politikën Europiane të Fqinjësisë gjatë viteve 1995-1999, ndërsa pas vitit 1999 pati një Komisioner për Zgjerimin dhe Fqinjësinë. Për pesë vitet e ardhshme, BE do të ketë një komisioner për Fqinjësinë dhe Zgjerimin, duke theksuar në këtë mënyrë një prioritet më të ulët të zgjerimit se sa më parë.
