Grupi i hakersave i njohur si Redanons-Al arriti objektivin e vet më të madh duke nxjerrë jashtë funksioni faqen e internetit të kryeministrisë.
Një grup hakersash opozitarë në Shqipëri arritën të rrëzojnë mëngjesin e të mërkurës faqen e kryeministrisë në internet, kryeministria.al, objektivi më i madh i shënjestruar dhe pushtuar prej tyre deri tani. Grupi i hakersave të quajtur “Redanons-Al” përdori faqen e kryeministrisë pasi e mori nën kontroll për të bërë thirrje për protesta kundër elitës politike në Shqipëri, duke shënjestruar njëkohësisht qeverinë dhe opozitën si një klikë e korruptuar.
“I bëjmë thirrje shoqërisë civile të angazhohet në protesta masive. Të protestojmë për rritjen e tarifave. Të protestojmë për një jetë më të mirë, për një gjykatë me të drejtë, për një mundësi arsimi të barabartë. Të protestojmë edhe kundër opozitës inkezistente të sotme,” thuhet në mesazh.
I njëjti grup hakersash pati sulmuar më 28 korrikun e kaluar pothuajse të gjitha faqet e ministrive duke publikuar në to një peticion proteste me dhjetë pika. Në valën e parë të sulmit, hakersat e Redanons-Al nuk patën rrëzuar faqen e Ministrisë së Bujqësisë, si dhe atë të Ministrisë së Mbrojtjes, të parën dyshohet se e kishin harruar, ndërsa të dytën mendohet se nuk kishin arritur ta vendosnin nën kontroll.
Hakersat i patën sugjeruar qeverisë mes të tjerash të ndryshojë menaxhmentin e Agjencisë Kombëtare të Shoqërisë së Informacionit AKSHI, duke i akuzuar si të paaftë. AKSHI është aktualisht institucioni që ka në menaxhim serverët e faqeve të internetit të qeverisë, të cilat janë përballur me sulme aktivistësh dhe shumë shpesh janë rrëzuar. Qeveria nuk ka komentuar publikisht mbi këto sulme.
Pas sulmit të 28 korrikut, pothuajse të gjitha faqet zyrtare të qeverisë në internet vendosën kodin e verifikimit vizual (VVC), një mjet që shërben për të dalluar vizitat e njerëzve nga vizitat e robotëve, si mjet për të shmangur një gamë sulmesh hakerash. Por këto masa duket se nuk mjaftuan.
