Një shqiptar tjetër nga Maqedonia raportohet se u vra në Siri këtë javë ndërkohë që qeveria e Shkupit ka ashpërsuar dënimet për shtetasit e vet që kapen duke lutuar krahas organizatave paramilitare të huaja.
Njëzet e tre vjeçari Xhelal Samakova nga Shkupi raportohet se u vra ndërsa po luftonte në Siri, duke e rritur numrin e nënshtetasve të Maqedonisë që kanë vdekur në konfliktin atje në së paku dhjetë, bëri të ditur media shqiptare e Maqedonisë.
Ai po luftonte me një grup rebel kundër regjimit të presidentit të Sirisë Bashar al-Assad.
“Vëllai ynë Xehlal, vdiq si martir. Allahu e pranoi atë si martir dhe ai do të bashkohet me ne në parajsë,” citohet ë ketë shkruar një faqe interneti e rebelëve të Sirisë.
Në gusht një shqiptar tjetër i Maqedonisë, Burhan Beslimi, gjithashtu nga Shkupi, raportohet se u vra atje.
Lajmi për vdekjen e fundit erdhi pasi parlamenti i Maqedonisë javën e kaluar nxitoi të amendojë kodin penal për të vendosur dënime me burg për nënshtetasit e Maqedonisë që luftojnë për organizata paraushtarake të huaja.
Ligji parashikon një dënim minimal prej pesë vitesh burg për ata që vërtetohet se kanë marrë pjesë në grupime paraushtarake të huaja. I njëjti dënim do të zbatohet edhe për ata që gjenden fajtorë për mbështetje jo të drejtpërdrejtë për veprime të tilla.
Ndihma dhe rekrutimi i militantëve do të dënohet me katër vjet burg minimalisht.
“Të gjitha veprimet që cënojnë sigurinë botërore apo kombëtare do të dënohen me burg. Dënimet janë mjaftueshëm të ashpra për të dërguar një mesazh të qartë se ne nuk do të tolerojmë sjellje të tillë,” deklaroi ministrja e brendshme e Maqedonisë Gordana Jankuloska para parlamentit javën e kaluar.
Ish-shefi i shërbimeve sekrete të Maqedonisë Vladimir Pivovarov thotë se burgosja e militantëve është më e pakta që mund të bëjë vendi për të mbrojtur veten.
“Dënimet janë të buta, duke marrë parasysh seriozitetin e situatës,” tha Pivovarov.
Ai argumentoi se ata që luftojnë krahas grupimeve militante jashtë vendit duhet të ndalohet të kthehen në Maqedoni.
“Kjo masë ka kuptim sepse edhe nëse këto njerëz zbulohen dhe burgosen, personalisht nuk besoj se burgu do t’i bëjë ata besnikë ndaj vendit të vet sërish,” tha ai.
