Rrjetet sociale janë kthyer në fusha dueli për guximtarët që hapin dhe pranojnë sfida. Pas suksesit të sfidës së kovës së akullit #icebucketchallenge, një nismë bamirësie që mblodhi plot 98.2 milion dollarë në mbarë botën, Shqipëria është përfshirë në një tjetër sfidë, atë të librit.
Sfida e Librit është trendi më i ri që ka pushtuar profilet e shqiptarëve në rrjetet sociale si Facebook dhe Twitter. Rregullat janë të thjeshta, pranoni sfidën, rekomandoni dhjetë librat tuaj të parapëlqyer dhe kandidoni disa miq.
Në një vend ku analfabetizmi mbetet një problem madhor te adoleshentët dhe ku shtëpitë botuese ankohen për piraterinë dhe për faktin se lexuesit i drejtohen librit vetëm në eventin e përvitshëm të Panairit, ky mendohet të jetë një hap përpara.
Në kremtimin e 69-vjetorit të themelimit të Bibliotekës Publike të Durrësit, bibliotekarja Teuta Dhima, pranë këtij institucioni, tha për BIRN se leximi është dhe mbetet një traditë që kalohet nga njëri brez në tjetrin.
“Lexuesi i mirë dhe cilësor nuk e largon lehtësisht librin nga dora, pavarësisht ngarkesës dhe kërkesave të jetës së përditshme. Numri në rritje i anëtarësimeve pranë Bibliotekës Publike të Durrësit është një dëshmues i qartë i afërsisë së lexuesve, sidomos durrsakë, me librin”, shprehet ajo.
E pyetur se cila grupmoshë është më aktive, Dhima u përgjigj se vendosja e literaturës së detyruar në shkolla ka bërë të mundur që nxënësit dhe studentët të jenë ata që trokasin më shpesh në dyert e tempullit të dijes, siç i pëlqen dhe asaj ta quajë institucionin ku punon.
Rekomandimet në rrjetet sociale po nxjerrin gjithnjë e më në pah se zhanri i preferuar i shqiptarëve mbetet romani, i pasuar nga drama dhe poezia. Ndër librat e preferuar që përbëjnë ‘Top 10’ e sugjerimit nuk mungojnë klasikët, por as edhe shkrimtarët e huaj bashkëkohorë.
Nga pena shqiptare autori më i lexuar, mbetet përfaqësuesi botëror i letërsisë shqipe, Ismail Kadare, por nuk përmenden pak herë autorë si Poradeci, Noli, Fishta, Petro Marko, Kuteli, e bashkëkohorë si Kongoli, Blushi, Fevziu, Açka dhe Vehbiu.
Por në dhjetëshen e preferuar të lexuesit shqiptar nuk ka munguar as literatura fetare, ku Bibla dhe Kurani janë sugjerimet më të hasura në listat e besimtarëve në harmoni të Shqipërisë.
Edhe në blerjet online, porositë e librave nuk janë të pakta, por fakti më interesant është se numri i porosive që vijnë nga jashtë është gjithnjë e në rritje dhe se fluksi i dërgesave nga Shqipëria drejt vendeve të ndryshme të botës është i lartë.
“Problematika kryesore e Bibliotekës Publike të Durrësit mbetet mirëmbajtja e librave dhe dorëzimi i tyre në afatin e përcaktuar nga ana e lexuesit,” tërheq vëmendjen bibliotekarja Teuta Dhima.
Gjithsesi, nëse shqiptarët nuk po lexojnë në mënyrë aktive, ata po flasin më tepër për librat teksa sfida e librit vazhdon rrugëtimin e vet nga një profil në tjetrin.
