Eshtrat e shqiptarëve etnikë që mbetën të vrarë gjatë luftës në fund të viteve ’90 dhe u varrosën në një varr masiv pranë qytetit serb Rashkë janë kthyer në Kosovë për identifikim.
Foto: EULEX
Misioni i BE për sundimin e ligjit në Kosovë, EULEX, tha të premten se kishte marrë eshtrat e shqiptarëve etnikë që besohet se janë vrarë nga forcat serbe gjatë konfliktit; trupat e të cilëve u çuan më vonë në guroren e Rudnicës pranë Rashkës për t’u varrosur në mënyrë sekrete në një varr masiv.
“Personeli i EULEX që punon në Departamentin Mjekoligjor të Kosovës (DFM) mori nga autoritetet serbe eshtrat e riatdhesuara të 24 individëve të zhvarrosur gjatë gërmimeve më të fundit në Rashkë,” u shpreh EULEX në një deklaratë.
“Prova dhe materiale shtesë iu dorëzuan EULEX,” u tha.
Eshtrat do të transportohen në zyrat qendrore në Prishtinë për identifikim dhe më pas do t’i dorëzohen familjarëve të viktimave.
Ky është riatdhesimi i dytë i kufomave të nxjerra nga varri masiv i gurores së Rudnicës. Deri më tani, një total prej 40 trupash janë kthyer në Kosovë.
Sipas Prenk Gjetaj, kreu i komisionit qeveritar të Kosovës për personat e humbur, një total prej 45 trupash janë gjetur atje.
Gjetaj tha se autoritetet besojnë se eshtrat e shqiptarëve të Kosovës u zhdukën gjatë konfliktit të vitit 1998-99 në Rrezallë, një fshat në zonën e Skënderajt.
Megjithatë mbetet që testet e ADN-së të miratojnë dyshimet.
Zona pranë Rudnicës fillimisht u hetua në vitin 2010, pasi prokuroria serbe e krimeve të luftës, në bashkëpunim me misionin EULEX, lajmëroi se mund të kishte një varr masiv në Rashkë që përmbante trupat e të paktën 250 shqiptarëve, megjithëse asgjë nuk u gjet deri vitin e shkuar.
Ende mbeten rreth 1700 persona të listuar si të humbur si rezultat i konfliktit të Kosovës.
