Një dëshmitar tha në gjyqin e Grupit të Drenicës, qelizë e Ushtrisë Çlirimtare të Kosovës, akuzuar për sulme ndaj të burgosurve në luftën ’98-99, se ai u rrah disa herë nga të pandehurit.
Dëshmitari i prokurorisë me emrin e koduar “Dëshmitari A”, tha në gjykatë të hënën se ai u sulmua rëndë nga ish-ambasadori i Prishtinës në Shqipëri dhe ish-komandanti i Forcave të Sigurisë së Kosovës, Sylejman Selimi dhe nga anëtarë të tjerë të Grupit të Drenicës.
Dëshmitari A tha se ish-luftëtarët e UÇK-së e rrahën “sepse sipas tyre ai kishte bashkëpunuar me Serbinë” gjatë konfliktit të Beogradit me forcat guerile.
Ai i përshkruan burrat që e rrahën si “të pamëshirshëm”.
Selimi dhe gjashtë ish-luftëtarë të UÇK-së janë në gjyq për torturim dhe keqtrajtim të të burgosurve në qendrën e burgimit në Likovac në vitin 1998.
Sipas aktakuzës të hartuar nga prokurorët e BE, Selimi “në kapacitetin e një anëtari të UÇK dhe si një person nën kontroll të qendrës së paraburgimit në Likovac në bashkëpunim me Sami Lushtakun, Avni Zabelin dhe Sahit Jasharin, dhunuan integritetin trupor dhe shëndetin e një numri të pacaktuar civilësh shqiptarë”, të cilët mbaheshin atje.
Në shtatorin e 1998, ai akuzohet se ka abuzuar me Dëshmitarin A, duke e rrahur me grushte dhe me shkopinj druri.
Ai akuzohet gjithashtu se ka porositur Dëshmitarin B dhe civilë të tjerë të burgosur në Likovac t’i gjuanin Dëshmitarit A me një dërrasë druri dhe ka ngacmuar gjenitalet e Dëshmitarit A me një mjet hekuri, e për pasojë e ka tërhequr me të në dysheme.”
Përveç ish-ambasadorit Selimi, një tjetër politikan i njohur dhe ish-anëtar i UÇK-së, Sami Lushtaku, akuzohet për keqtrajtim të të burgosurve dhe vrasjen e një burri në qendrën e paraburgimit të UÇK.
Lindur në Drenicë në vitin 1970, Selimi ishte një komandant i UÇK në zonën e Drenicës në vitin 1998-99 dhe komandoi Trupat e Mbrojtjes së Kosovës nga 2006 deri në 2009, po ashtu edhe Forcat e Sigurisë së Kosovës nga 2009-2011, përpara se të bëhej ambasador në Tiranë.
Në maj të këtij viti, ai u shpall i pafajshëm për krime lufte mbi akuzat e rrahjes dhe torturimit të dy grave gjatë luftës në ish-provincën serbe.
