Bukureshti do të udhëheqë një projekt të mbështetur nga NATO që synon të ndihmojë Ukrainën të mbrojë rrjetet e saj kompjuterike dhe të komunikimit përballë sulmeve të mundshme nga Rusia.
Agjencia e Shërbimeve Informative të Rumanisë, SRI, tha të dielën dhe do të bëhet koordinatore për një projekt të financuar nga vendet anëtare të NATO-s për të zhvilluar mekanizma të mbrojtjes kibernetike për Kievin.
“Për shkak të kontekstit të krijuar nga tensionet në rritje mes Rusisë dhe Ukrainës dhe nevojave të NATO-s për të fuqizuar kufirin e vet lindor, masa të reja sigurie do të zbatohen,” deklaroi SRI në një komunikatë për shtyp.
“Specialistë rumunë në sigurinë e informacionit janë ngarkuar me përcaktimin e nevojave teknike dhe arkitekturën e sistemit të sigurisë për mbrojtjen e infrastrukturës me rëndësi kritike të IT&C [Teknologjia e Informacionit dhe Komunikimit] kundër kërcënimeve kibernetike,” shtoi SRI.
Rumania do të sigurojë gjithashtu trajnime në menaxhim projekti për specialistët ukrainas për t’u siguruar që sistemi do të japë rezultate konkrete.
Sulmet kibernetike janë bërë të zakonshme gjatë konflikteve ushtarake përgjatë viteve të fundit dhe sulme të tilla aludohet se janë kryer nga hakersa rusë gjatë luftës së Moskës kundër Gjeorgjisë në vitin 2008.
Me 694 kilometra vijë kufitare me Ukrainën, Rumania është bërë nga mbështetësit më të mëdhenj në rajon të angazhimit të SHBA-ve dhe NATO-s për sigurinë e rajonit.
Rumania, vend anëtar i NATO-s, është një nga mbështetësit më të mëdhenj të aleancës mes vendeve ish-Komuniste.
Tetorin e kaluar, interceptorët amerikanë të raketave filluan të instalohen në bazën ushtarake Deveselu në jug të Rumanisë. Instalimi i tyre pritet të përfundojë nga viti 2015 si pjesë e fazës së dytë të një projekti të udhëhequr nga amerikanët për të ndërtuar një mburojë raketore në Europë.
Skema shikohet me dyshime të thella në Moskë. Puna në Deveselu përfshin investime të vlerësuara në 400 milionë dollarë.
Aeroporti Mihail Kogalniceanu i Rumanisë pranë brigjeve të Detit të Zi u bë një bazë e rëndësishme ushtarake amerikane në vitin 2007 dhe rreth 1,600 trupa janë vendosur aty që nga ajo kohë.
Burimi: Balkaninsight
