Kroacia shpreson të mbledhë rreth 400 milionë euro nga shitja e kompanive publike me humbje, hoteleve, një porti dhe një banke.
Zyra e Shtetit të Kroacisë për Menaxhimin e Pronave Shtetërore DUUDI filloi një fushatë për shitjen e pronave shtetërore me synimin për të mbushur deficitin buxhetor.
DUUDI sakaq ka nisur tenderë për tri hotele shtetërore, hotelin Imperial, i cili gjendet në ishullin Rab si dhe hotelet Maestral dhe Plat në Dubrovnik. Që të treja hotelet janë me humbje.
Në bursën e Zagrebit, aksionet e Imperial ranë me 7.1 për qind ndërsa ato të Maestral me 28.4 për qind.
DUUDI ka vendosur gjithashtu në shitje kompaninë shtetërore të transportit Jadroplov dhe kantierin detar të Rijekës Treci Maj për shitje. Kantieret dertare në Kroaci janë telashe të përhershme financiare për shtetin për shkak se varen nga subvencionimet për të mbijetuar.
Kreu i DUUDI Mladen Pejnovic njoftoi gjithashtu shitjen e portit të Plloces, Bankës Postare, HPB, kompania industriale Koncar dhe paketën shtetërore prej 3.5 për qind në kompaninë e Telekomit HT, operatori më i madh i telekomunikacionit në Kroaci, i cili i qe shitur në vitin 1999 Deutsche Telekom.
HPB u nxorr në shitje vitin e kaluar por shitja dështoi. Shitja konsiderohet e komplikuar pasi varet nga bashkëpunimi me Bankën kombëtare të Kroacisë, HNB.
Pejnovic tha se DUUDI po planifikon të marrë rreth 400 milionë euro nga shitja e aseteve shtetërore.
DUUDI sakaq ka filluar “Prjektin 100”, që synon të ofrojë 100 prona të patundshme për qytetarët e Kroacisë.
Njëri prej tyre është Goli Otok, një kamp burg nga epoka komuniste, shitja e të cilit ka shkaktuar kritika publike.
Pejnovic tha se të ardhurat nga pronat publike më 2013 shënuan një rekord historik. Gjithsesi, fitimet nuk përmbushin vlerën e aseteve në fjalë. Shteti i Kroacisë ka një portofol pronash të stërmadh të vlerësuar në 31.4 miliardë euro.
