Partitë e shqiptarëve thonë se fëmijët e tyre kanë nevojë për libra të përshtatur për nevojat e tyre dhe jo për përkthime të kurikullave të zakonshme të Malit të Zi.
Partitë etnike të shqiptarëve në Malin e Zi protestuan të martën për “kurikullat e papërshtatshme” që kanë fëmijët e tyre nëpër shkollat publike të vendit.
Ata thonë se programet mësimore në shkolla nuk janë të përshtatshme për nevojat e bashkësisë për shkak se librat janë thjeshtë përkthime në shqip të librave të shkruara për nxënësit malazezë.
Partia opozitare FORCA tha se nxënësit shqiptarë po i nënshtrohen një “kurrikulle të imponuar”.
“Imponimi i teksteve të përkthyera në shqipp… është jashtë kohe dhe e dëmshme për identitetin kombëtar të shqiptarëve. Kjo ka qenë praktika e Ministrisë së Arsimit prej shumë vitesh,” deklaroi kjo parti në një komunikatë për shtyp.
FORCA tha se Këshilli Kombëtar i Shqiptarëve Etnikë në Malin e Zi duhet të konsultohet kur vjen puna për të hartuar kurrikullat e reja.
Është detyrim ligjor dhe kushtetues i Malit të Zi, shtoi partia, për të respektuar nevojat arsimore të bashkësive të ndryshme etnike.
Të dhënat statistikore të qeverisë tregojnë se shqiptarët përbëjnë 5 për qind të popullatës së Malit të Zi.
Nuk ka shkolla ekskluzivisht shqiptare në vend. Gjithsesi, komunat me shumicë apo me prani të madhe të popullatës etnike shqiptare kanë klasa në gjuhën shqipe.
Vitin e kaluar rreth 3 mijë studentë në komunat e Podgoricës, Ulqinit dhe Guçisë ndoqën klasat e gjuhës shqipe.