Ftesat për t’iu bashkuar të ashtuquajturës “Ushtria e Sanxhakut” në një rajon me shumicë boshnjake të Serbisë kanë nxitur prokurorët të kërkojnë hetime.
Branko Stamenkovic, prokuror i krimeve të teknologjisë së lartë, ka urdhëruar që policia serbe të mbledhë informacion për njerëzit që fshihen pas faqes “Ushtria e Sanxhakut”.
Ekzistojnë disa faqe që kanë emrin e Ushtrisë së Sanxhakut, shumica të hapura javët e fundit. Asnjë prej tyre nuk ka më shumë se 120 anëtarë.
Përveç thirrjeve për të formuar një Republikë të pavarur të Sanxhakut dhe një ushtri, postimet i nxisin njerëzit të bashkohen dhe t’i tregojnë botës “cilët janë bijtë e Sanxhakut”.
“Ka disa të dhëna sipas së cilave prokuroria mund të merret me këtë çështje. Pasi të mbledhim informacion, do t’ia përcjellim atë publikut,” tha Stamenkovic në TV B92 të mërkurën.
Ushtria e Sanxhakut është formuar për të mbrojtur shumicën boshnjake të rajonit dhe territorin e Sanxhakut në jugperëndim të vendit nga sulmet e nacionalistëve serbë.
Disa anëtarë të lëvizjes e kanë përdorur Facebook për të lajmëruar se po planifikojnë një marshim në Novi Pazar, qytetin kryesor të rajonit.
Tensionet janë rritur së fundmi në qytet pas një parade që mbajtën 30 djem të rinj të veshur me bluza dhe pantallona të gjelbra, që shoqëronin myftiun e Sanxhakut, Muamer Zukorlic, teksa përkujtonin 70 vjetorin e vrasjeve masive të boshnjakëve nga regjimi komunist.
Disa politikanë e akuzuan myftiun Zukorlic për keqpërdorim të të rinjve për qëllime politike.
“Pas këtyre imazheve në zemër të Europës, kur frika për shtimin e radikalizmit islamik është në rritje, asnjë investitor nuk do të dojë të vijë në Sanxhak,” tha për të përditshmen Blic më 6 shtator Rasim Ljajic, zëvendës kryeministër, i cili është nga kjo zonë.
Organizuesit pretendojnë se të rinjtë nuk ishin të veshur me uniforma paraushtarake por me kostume tradicionale.
“Aktivistët e Komunitetit Islamik u veshën me të gjelbër sepse e gjelbra është ngjyra e Islamit. Ata vunë kapele në kokë sepse është traditë e boshnjakëve,” thanë ata për Blic pas eventit.
