Autoritetet shëndetësore në Malin e Zi shprehën shqetësime të rënda pasi statistikat e fundit tregojnë imbalancë të madhe mes numrit të foshnjave meshkuj dhe femra.
Të dhënat e Ministrisë së Shëndetësisë të Malit të Zi tregojnë se në këtë vend kanë lindur 100 vajza për 110 djem ndërkohë që raporti natyror është 100 femra për 102 deri në 104 djem.
Nuk është natyra përgjegjëse për këtë zhbalancim – por popullariteti i abortit selektiv gjinor në një vend që sërish konsideron si më të rëndësishëm fëmijët djem se sa vajzat.
Të martën, drejtori i Qendrës Kombëtare për Mjekësinë Gjenetike dhe Imunologjinë, Olivera Miljanovic, paralajmëroi se selektivizmi gjinor para lindjes është një tendencë në rritje në Malin e Zi që prej 15 vjetësh.
“Tashmë, përkundrejt çmimeve nga 500 në 700 euro, faqe të shumta interneti ofrojnë shërbime të hershme të identifikimit të gjinisë. Kjo është “goditja më e fundit” e mjekësisë moderne, një metodë joinvazive në identifikimin të seksit të fëmijës duke përdorur analizimin e gjakut të nënës,” tha Miljanic në një konferencë për shtyp.
Aborti selektiv gjinor ka qenë i paligjshëm në Malin e Zi që nga viti 2009 dhe abuzimi me mjetet e paracaktimit të seksit të fëmijëve të palindur konsiderohet si vepër penale.
Por autoritetet thonë se nuk kanë shumë në dorë për të bërë për të ndaluar gratë nga dëshira për të abortuar vajzat ndërsa kultura dominuese vijon t’i japë vlerësim të lartë trashëgimtarëve meshkuj.
Kreu i Komisionit Parlamentar për Barazinë Gjinore, Nada Drobnjak, tha se shteti dhe shoqëria duhet të rrisë ndërgjegjësimin e njerëzve mbi këtë problem.
Në mars, Këshilli i Europës i bëri thirrje Malit të Zi të trajnojë punonjësit e shëndetësisë dhe të miratojë rregulla të rrepta për të parandaluar abortin selektiv.
Vitin e kaluar, Fondi i Popullatës të Organizatës së Kombeve të Bashkuara UNFP, e renditi Malin e Zi mes vendeve me imbalancën më të madhe gjinore mes meshkujve dhe femrave, krahas Indisë, Shqipërisë, Azerbajxhanit dhe Armenisë.
Ndërsa disa zyrtarë malazezë fillimisht mohuan sugjerimin se aborti selektiv gjinor është shumë i përhapur, qeveria tashmë ka ngritur një grup pune për të shqyrtuar problemin.
