Vizita e Papës Françesk do të ndryshojë stereotipet negative mbi Shqipërinë si një vend i varfër dhe i prapambetur dhe mund të nxisë më shumë të huaj për ta vizituar, shpresojnë zyrtarët e turizmit.
“Një vizitë e… një figure si Papa është një reklamë pozitive dhe vëmendja që ai do të tërheqë në media do të kundërbalancojë imazhin e padrejtë të Shqipërisë si vend mysliman dhe i prapambetur,” tha Kliton Gërxhani, një konsulent i turizmit në Shqipëri për BIRN.
Zëdhënësi i Kishës Katolike Shqiptare, At Gergj Pashk Meta, tha se më shumë se 600 gazetarë të huaj janë akredituar për të mbuluar vizitën – e para e tillë për Papën e ri në një vend Europian.
Autoritetet presin gjithashtu deri në 100 mijë pelegrinë që do të vijnë në Shqipëri për të parë Papën Françesk.
Por Gërxhani tha se mbulimi mediatik ndërkombëtar i vizitës ka gjasa që do të ketë ndikim pozitiv afatgjatë më shumë se sa ndikim ekonomik të menjëhershëm nga pelegrinët.
Megjithëse Shqipëria është një vend me shumicë myslimane, ne kemi një traditë të gjatë të bashkëjetesës fetare mes njerëzve të besimeve të ndryshme.
Sipas censusit të vitit 2011, 56.7 për qind e shqiptarëve e përcaktojnë veten si muslimanë, 2.09 për qind e quajnë veten Bektashi, 10.53 për qind janë Katolikë dhe 6.75 për qind janë Orthodoksë Kristianë. Rreth 2.5 për qind e përkufizojnë veten si ateistë dhe 5.53 për qind janë besimtarë pa religjion.
Papa Gjon Pali i Dytë qe i pari që vizitoi Shqipërinë, një vit pas rënies së regjimit komunist në vitin 1993.
Vizita njëditore e Papës Françeskt të dielën do të fillojë me një ceremoni mirëseardhjeje në aeroportin ndërkombëtar të Tiranës, ku do të përshëndetet nga kryeministri Edi Rama.
Nga aeroporti, Papa do të vizitojë në Pallatin e Presidentit ku do të takohet për kortezi me Presidentin, Bujar Nishani. Pas kësaj, do të takohet me autoritetet civile.
Kulmi i vizitës së tij do të shënohet në një meshë të hapur në Sheshin Nënë Tereza, pasuar nga recitimi i Angelus.
Papa Françesk do të takohet me priftërinjtë shqiptarë për drekë në Nunciaturën Apostolike.
Në mbrëmje, Papa Françesk do të takohet me udhëheqësit e religjioneve të tjera dhe denominimet e tjera kristiane në Universitetin Katolik “Zoja e Këshillit të Mirë.”
Papa do të udhëtojë për te Katedralja e Shën Palit në mbrëmje për lutjet e mbrëmjes me priftërinjtë, seminaristët dhe të tjerë.
Ngjarja e fundit në një axhendë të ngjeshur do të jetë takim me fëmijët e “Centro Betania,” krahas përfaqësuesve të institucioneve të tjera bamirëse në Shqipëri.