Gjykatësit në gjyqin e komandantit gueril të kthyer në politikan, Fatmir Limaj dhe të nëntë ish-luftëtarëve të tjerë të akuzuar për abuzime në qendrën e burgimit të luftës Kleçka, u skualifikuan pasi u ngrit pretendimi se ishin paragjykues.
Gjykata e Apelit në Prishtinë skualifikoi të mërkurën treshen e gjykatësve të çështjes Kleçka të krimeve të luftës pasi skuadra e mbrojtjes pretendoi se ata ishin paragjykues në gjyqin ndaj ish-guerilasve të Ushtrisë Çlirimtare të Kosovës.
Çështja u ndërpre më 18 shtator kur mbrojtja kërkoi skualifikimin e gjykatësve për shkak se sipas saj të tre gjykatësit nuk e kryenin punën siç duhet dhe se morën rolin e prokurorisë kur u pyet një dëshmitar.
Avokatët mbrojtës thanë gjithashtu se paneli i gjykatësve duhet të konsistojë në dy gjykatës vendas dhe një ndërkombëtar, sipas ligjit të ri të Kosovës që parashikon rolin e misionit të BE për sundimin e ligjit në vend.
Gjykata e apelit të Kosovës rihapi muajin e shkuar çështjen kundër Limajt dhe nëntë të tjerëve të akuzuar për abuzim me të burgosurit në qendrën Kleçka të burgimit.
Lirimi i Limajt ndaj akuzave të Kleçkës në shtator 2013 .ishte hera e dytë që deputeti i njohur dhe ish-luftëtari i UÇK, i njohur si Komandant Çeliku nuk u shpall fajtor për abuzime gjatë luftës.
Sipas aktakuzës, Limaj dhe nëntë të tjerë, burgosën në Kleçka civilët shqiptarë që dyshoheshin si bashkëpunëtor me regjimin serb, civilët serb dhe personelin e policisë dhe ushtrisë serbe. Kleçka shërbente gjithashtu si kamp burgimi për ushtarët e UÇK që ishin nën hetim apo që kishin kryer shkelje disiplinore.
Limaj u lirua gjithashtu nga Gjykata e Hagës në 2005 për krime lufte kundër serbëve dhe shqiptarëve të dyshuar për bashkëpunim me Serbinë gjatë konfliktit të Kosovës.
Në mars të këtij viti, ai dhe ish-sekretari i UÇK-së Jakup Krasniqi themeluan një parti të re politike, Nisma për Kosovën. Ai fitoi gjashtë vende në parlamentin me 120 deputetë të Kosovës në zgjedhjet e qershorit të 2014.
