Një tjetër dëshmitar në gjyqin e “Grupit të Drenicës” së Ushtrisë Çlirimtare të Kosovës, akuzuar për sulme ndaj të burgosurve të luftës, ka përgënjeshtruar deklaratën që kishte bërë më herët e cila inkriminonte të pandehurit.
Një dëshmitar i mbrojtur tha në gjykatën e Mitrovicës në gjyqin e shtatë ish-luftëtarëve të UÇK, se ai nuk e mbante mend se cili gueril e mori atë dhe të vëllain, pavarësisht se në deklaratën e mëparshme kishte përmendur se Ismet Haxha ishte një prej tyre.
“Nuk e di nëse e kam thënë, por ndoshta e kam thënë sepse njerëzit po thoshin të njëjtën gjë,” tha një dëshmitar i mbrojtur me emrin e koduar “O”.
Përgënjeshtrimi i deklaratës së mëparshme të tij vjen pas një incidenti të ngjashëm në gjyqin e së artës, kur një tjetër dëshmitar e ndryshoi dëshminë fillestare dhe tha se nuk ishte keqtrajtuar në qendrën e paraburgimit në Likovac pasi u burgos prej luftëtarëve të UÇK-së, siç kishte pretenduar më herët.
Në gjyq janë ish-ambasadori i Prishtinës në Shqipëri dhe njëkohësisht ish-komandant i forcave të sigurisë të Kosovës, Sylejman Selimi, së bashku me bashkiakun e Skënderajt, Sami Lushtaku dhe pesë ish-anëtarë të tjerë të UÇK, përfshirë Ismet Haxhën.
Ata akuzohen për torturë dhe keqtrajtim të të burgosurve në qendrën e Likovacit në 1998.
Një tjetër dëshmitar i mbrojtur me emrin e koduar “N” gjithashtu dëshmoi të mërkurën se i afërmi i tij, dëshmitari F, ishte burgosur në Likovac nga luftëtarët e UÇK.
Ismet Haxha akuzohet se ka qëlluar dhe plagosur dëshmitarin F.
Dëshmitari N tha se ai kishte dëgjuar se i afërmi i tij ishte qëlluar, por nuk e dinte kush e kishte bërë.
“I thash se ai meritonte një plumb kokës dhe jo në këmbë, sepse e kisha paralajmëruar më parë se diçka e keqe do t’i ndodhte meqë të gjithë e dinin se ishte spiun serb,” tha dëshmitari N.
I pyetur nga prokurori se çfarë i ndodhi të afërmit të tij pasi ai u burgos në Likovac, dëshmitari N u përgjigj: “Nuk e di, sepse ai nuk më tregoi për këto gjëra. Se çfarë i ndodhi atij, e di ai më mirë.”
